Քադաֆին վստահեցնում է, որ երբեք չի ղեկավարել Լիբիան

Լիբիայի ղեկավար Մուամար Քադաֆիի կողմից հավաքագրված վարձկանների հատուկ գնդերը, որոնց անվանում են «սև հեծելավաշտ», ջարդ են կազմակերպել երկրի մայրաքաղաք Տրիպոլիից 50 կմ հեռավորության վրա գտնվող Զաուիյա քաղաքում: Այնտեղ Քադաֆիի դեմ ապստամբել են ամազիգների (բերբերների) ցեղախմբերը, որոնց դեմ Լիբիայի առաջնորդին սատարող ուժերն օգտագործում են ծանր հրետանի և ուղղաթիռներ:

Բախումների ընթացքում մահացել են տասնյալ քաղաքացիներ, ավերվել են մզկիթներ, տներ, դպրոցներ: Այունուամենայնիվ, ինչպես Լոնդոնից հաղորդում է լիբիացի լրագրող Ջումաա ալ-Քումատին, ժողովուրդը շարունակում է դիմադրություն ցույց տալ վարձկաններին:

Քադաֆիի հսկողության տակ շարունակում է մնալ Սիրտը` Լիբիայի նավթային մայրաքաղաքը, որը գտնվում է Տրիպոլիից 650 կմ. Հեռավորության վրա: Սակայն զինտան ցեղի շեյխերն այսօր Քադաֆիին վերջնագիր են ներկայացրել: Հավաքվելով համանուն Զինտան քաղաքում` նրանք բռնակալից պահանջել են հեռանալ: Հակառակ դեպքում բեդուինները խոստանում են 24 ժամվա ընթացքում արգելափակել նավթի արտահանումը և շարժվել դեպի մայրաքաղաք: Զինտանները կոչ են արել բոլոր մյուս ցեղերին միավորվել և ազատել երկիրը բռնապետից:

Ինքը`Քադաֆին, այսօր ելույթ է ունեցել պետական հեռուստատեսության եթերում, սակայն ելույթը հեռարձակվել է հեռախոսազրույցի տարբերակով, այնպես որ նրա գտնվելու վայրը շարունակում է անհայտ մնալ:

Քադաֆին հերթական անգամ հայտարարել է, որ նրա դեմ հանդես եկողները թմրանյութների ազդեցության տակ են: Նա նաև զգուշացրել է, որ եթե ընդդիմադիրները հաղթեն, ապա իշխանությունն իր ձեռքը կվերցնի Ուսամա Բեն Լադենը:

«Ինչո՞ւ եք ցանկանում երկիրը հանձնել Բեն Լադենին»,- հարցրել է երկրի ղեկավարը` վստահեցնելով, որ ինքը ամենևին էլ բռնակալ չէ և անգամ իրականում երբեք երկիրը չի ղեկավարել:

«Ես ընդամենը ցանկանում եմ հայրենասիրություն դրսևորել և հայրական խորհուրդներ տալ», – ասել է Քադաֆին` իրեն համեմատելով Մեծ Բրիտանիայի թագուհի Եղիսաբեթ 2-րդի հետ: