Home / Հայաստան / Գազի գնի չթանկանալու պատճառը Մեդվեդևի սերը չէր, այլ սովորական սխալը. Բագրատյան

Գազի գնի չթանկանալու պատճառը Մեդվեդևի սերը չէր, այլ սովորական սխալը. Բագրատյան

«Մեդվեդևը հայտնաբերել է, որ Հայաստանում իրականում տալիս են ամենաթանկ գազերից մեկը, հանկարծ էս մարդիկ հասկանում են, որ ստրատեգիական գործընկերն էդքան էլ հիմար չէ, գլխի է ընկել` իր հետ ինչ են անում»: Այսօր մամուլի ասուլիսին ՀՀ նախկին վարչապետ, ՀԱԿ անդամ Հրանտ Բագրատյանն անդրադարձել է ուրբաթ օրը ՀՀ նախագահ Սերժ Սարգսյանի և ՌԴ նախագահի Դմիտրի Մեդվեդևի հանդիպման ընթացքում ձեռք բերված այն պայմանավորվածությանը, որ գազի գինը Հայաստանի համար չի թանկանալու:

«Երբ «Գազպրոմը» հարցրեց «ՀայՌուսԳազարդին»` եղբայր, մենք գազի գինը 27 տոկոսով բարձրացրել ենք, սպառող խումբը պակասել է 44%-ով, ի՞նչն է պատճառը: Հանկարծ «Գազպրոմը» հայտնաբերեց, որ գազի իրական գինը Հայաստանում 400 դոլար է», – ասել է Բագրատյանը:

Նրա կարծիքով` Մեդվեդևը որոշել է գազի գինն այլևս չբարձրացրել ոչ թե նրա համար, որ սիրում է Սերժ Սարգսյանին, այլ հասկացավ, որ «հիմարություն է տեղի ունեցել»:

«Այսինքն, եթե 27 տոկոս գին են բարձրացրել, 44 տոկոս սպառումն է պակասել, 17 տոկոս վնասվել է: Դա կոչվում է սովորական սխալ, որի համար պատժում են», – ասել է Բագրատյանը` հավելելով, որ պետք է պատժվեր «ՀայՌուսԳազարդի» ղեկավարությունը և «Գազպրոմի» համապատասխան ծառայությունները:

Բագրատյանը ևս մեկ անգամ նշել է, որ Սերժ Սարգսյանն ու կառավարությունը պետք է հրաժարվեն գազի գնի շուրջ քննարկումներից. «Գազը ապրանք է, որը մատակարարում է «Գազպրոմ» կոմերցիոն կառույցը «Հայռուսգազարդ» կոմերցիոն կառույցին»:

Տնտեսագետը նաև առաջարկել է, որ գազը գնի և տրամադրի քաղաքապետարանը. «Առաջարկում եմ` Երևանի քաղաքապետը 96-ով (նկատի ունի 1 կուբոմետրը 96 դրամով-Epress.am) թող գազն առնի, 3000 դրամ իրա ծախսը (ամսեկան սպասարկման վճարը) ավելացնի, տա մեզ: Ինքն էլ «ՀայՌուսԳազարդում» աշխատել է: Նույնը թող անի Գյումրիի քաղաքապետը, նույնը թող անի Վանաձորը»:

Եվ, ընդհանրապես, Բագրատյանի խոսքով, պիտի ասվի, թե ի՞նչ գործ ունի «Հայռուսգազարդը» գազ մատակարարելու հետ. «Ես քաղաք եմ, գնում եմ գազը մեծածախ, ինքս էլ մատակակարում եմ, ինքս էլ կհետևեմ խողովակների վիճակին»: