Home / Հայաստան / «Էրդողանն ասեց՝ 60000 անլեգալ հայ կա». առևտրականները սպառնում են նստացույցով

«Էրդողանն ասեց՝ 60000 անլեգալ հայ կա». առևտրականները սպառնում են նստացույցով

Երևանի քաղաքապետարանի՝ բացօթյա առևտուրն արգելելու որոշման դեմ պայքարող առևտրականներն այսօր այցելել են Ազգային Ժողով` իրենց խնդիրը ներկայացնելու համար:

Առևտրականներից երկուսին ընդունել է ԱԺ ՀՀԿ խմբակցության ղեկավար Գալուստ Սահակյանը, Epress.am-ի հետ զրույցում փոխանցել է առևտրականներից տիկին Ալլան: Սահակյանի հետ զրույցում բողոքողներն ասել են, որ սովի են մատնվում և չեն կարողանում ապրել:

«Պատվիրակները Սահակյանին ասել են՝ «ոչ մի կուսակցություն չկարողացավ ընդառաջել, դուք մի բան արեք, հարցը օրակարգից հանեք և մտցրեք նոր կետ, որ թույլ տան ծաղիկների կողքին նաև կանաչի դրվի»: Նա լուռ լսել է, հետո ասել է, որ այսօր կքննարկի այդ հարցը: Պատասխանի համար մենք երկուշաբթի օրը ժամը 10.00-ին գնալու են ՀՀԿ-ի գրասենյակ: Իսկ եթե այս անգամ էլ հարցին լուծում չտրվի, մենք նստացույց ենք անելու»,- նշել է տիկին Ալլան:

Վերջինս իր խոսքում հիշել է նաև Թուրքիայի վարչապետ Ռեջեփ Թայիփ Էրդողանին.

«Եկել ես, գենոցիդ ես պահանջում, այ ընկեր Սահակյան, գենոցիդը դուք ստեղ եք անում, իսկ էնտեղից եք պահանջում: Էրդողանը քո ձայնը կտրելու համար ասեց 60000 անլեգալ հայ է ինձ մոտ ապրում, այսինքն` սովից մատնված եկել ա մոտս, չհաշված ինչքան գրանցվածներ կան: Դա ամոթ է հենց մեր ղեկավարության, մեր ազգի համար»,- ասել է տիկին Ալլան: