Epress.am Լուրեր Հայաստանից
«Սա դեռ հանրահավաք չէ, սա մեր առաջին վերադարձն է Ազատության հրապարակ, որտեղ միասին անցկացրինք զօր ու գիշեր», – այսօր Ազատության հրապարակում իր համակիրների ներկայությամբ հայտարարեց «Ժառանգություն» կուսակցության նախագահ Րաֆֆի Հովհաննիսյանը:
Այնուհետև նա անդրադարձավ համաներմամբ ազատ արձակված քաղբանտարկյալներին և շնորհավորեց նրանց ազատվելու կապակցությամբ: «Իրենք երբեք պետք է բանտարկված չլինեին: Երեք և ավելի տարիների ուշացումով կայացավ այդ ազատ արձակումը: Երեկ նաև քաղաքական բանտարկյալ Տիգրան Փոստանջյանը ազատ արձակվեց, մնում է Հացպանյանը և Բոջոլյանը և շատ ուրիշներ, ովքեր այս անարդար եղանակով գտնվում են անազատության մեջ: Ուշացումով է տեղի ունենում մեր երկրում շատ բան»,- ասել է Հովհաննիսյանը:
Անդրադառնալով Հայ Ազգային Կոնգրեսի և իշխանությունների երկխոսությանը` «Ժառանգության» նախագահը հաջողություն է մաղթել բանակցողներին և նշել, որ իրենք ողջունում են դա և միշտ էլ ողջունել են հրապարակային և հանրային երկխոսություններն ու բանակցությունները:
«Եթե հայտնի երկխոսությունը բերի արտահերթ ընտրությունների, այս ահավոր կործանարար իրավիճակի արտահերթ լուծման, մենք միայն կողջունենք այդ արտահերթ լուծումը և կգանահատենք թե իշխանության, թե ընդդիմադիր մեր գործընկերների այդ բանակցությունը: Չենք քննադատում, ամենայն անկեղծությամբ կողջունենք և կմասնակցենք այդ արտահերթ ընտրություններին` ինչ հերթականությամբ, որ դրանք տեղի ունենան, բայց եթե դրանից բացի կա մի այլ օրակարգ, որը գնում է պայմանավորվածությունների, որտեղ կդիտարկվեն այլ հարցեր, Արցախի հիմնահարցում անընդունելի զիջումներ, Թուրքիա-Հայաստան հարաբերություններում անընդունելի քաղաքականության շարունակություն, այստեղ, իմ կարծիքով, արդեն ժողովուրդը կասի «ոչ» մեղսակից համագործակցությանը»,- ասել է Րաֆֆի Հովհաննիսյանը: