Հայաստանն առաջին անգամ իր պատմության ընթացքում կխաղա իտալացիների հետ

2014 թվականի Աշխարհի գավաթի ընտրական փուլում Հայաստանի հավաքականը ուժերը կչափի B խմբում, որտեղ մեր թիմի հետ միասին ընդգրկվել են Իտալիայի, Դանիայի, Չեխիայի, Բուլղարիայի և Մալթայի հավաքականները:

Աշխարհի գավաթի ընտրական փուլի վիճակահանությունը կայացավ երեկ բրազիլական Ռիո-դե-Ժանյերո քաղաքում:

Եվրոպական գոտու 53 թիմերը բաժանվել են 9 խմբի: Աշխարհի գավաթի ուղեգիր են նվաճելու խմբերի հաղթողները, իսկ 9 խմբերից 8-ում լավագույն ցուցանիշ ապահոված երկրորդ թիմերը կազմելու են 4 զույգ` սեփական և մրցակցի հարկի տակ մեկական հանդիպում անցկացնելով:

Զույգերի 4 հաղթողները նույնպես խաղալու են Աշխարհի գավաթի եզրափակիչ փուլում:

Անմիջապես վիճակահանությունից հետո ֆուտբոլային մասնագետները նշել են, որ այն խումբը, որտեղ ընդգրկված է Հայաստանի ընտրանին, իր կազմով ուժեղագույններից մեկն է: Որպես Իտալիայի հավաքականի հիմնական մրցակից նշում են Չեխիայի և Դանիայի հավաքականները:

Նշենք, որ վերջին երկու թիմերի հետ Հայաստանը հանդիպել է ընտրական մրցաշարերում: 1996 թվականի Եվրոպայի առաջնության ընտրական փուլում մեր թիմը երկու անգամ զիջել է դանիացիներին` 0:2 և 1:3 հաշիվներով:

2006 թվականի Աշխարհի գավաթի ընտրական փուլում Հայաստանը հանդիպել է Չեխիայի ընտրանու հետ և նույնպես երկու անգամ պարտվել 0:3 և 1:4: Իտալիայի հավաքականի հետ իր պատմության ընթացքում Հայաստանի ընտրանին դեռևս չի հանդիպել:

2014թ. Աշխարհի գավաթի վիճակահանություն, եվրոպական գոտի.

A խումբ

Խորվաթիա, Սերբիա, Բելգիա, Շոտլանդիա, Մակեդոնիա, Ուելս

B խումբ

Իտալիա, Դանիա, Չեխիա, Բուլղարիա, Հայաստան, Մալթա

C խումբ

Գերմանիա, Շվեդիա, Իռլանդիա, Ավստրիա, Ֆարերյան կղզիներ, Ղազախստան

D խումբ

Հոլանդիա, Թուրքիա, Հունգարիա,Ռումինիա, Էստոնիա, Անդորրա

E խումբ

Նորվեգիա, Սլովենիա, Շվեյցարիա, Ալբանիա, Կիպրոս, Իսլանդիա

F խումբ

Պորտուգալիա, Ռուսաստան, Իսրայել, Հյուսիսային Իռլանդիա, Ադրբեջան, Լյուքսեմբուրգ

G խումբ

Հունաստան, Սլովակիա, Բոսնիա-Հերցեգովինա, Լիտվա, Լատվիա, Լիխտենշտեյն

H խումբ

Անգլիա, Չեռնոգորիա, Ուկրաինա, Լեհաստան, Մոլդովա, Սան Մարինո

I խումբ

Իսպանիա, Ֆրանսիա, Բելառուս, Վրաստան, Ֆինլանդիա