Epress.am Լուրեր Հայաստանից
Այն փաստը, որ ԵԱՀԿ ՄԽ-ի համանախագահ երկրները` ԱՄՆ-ն, Ռուսաստանը, Ֆրանսիան քրիստոնյա պետություններ են, պայմաններ է ստեղծում «հայկական օկուպացիայի» համար: Այս մասին SalamNews-ին հայտնել է Ադրբեջանի նախկին նախագահ Այազ Մութալիբովը:
Նա նշել է, որ Հայաստանը փորձում է աշխարհին ներկայացնել Լեռնային Ղարաբաղի խնդիրը որպես քրիստոնյա-մահմեդական պատերազմ:
«Բնական է, որ այդ ամենը ԵԱՀԿ ՄԽ-ի ճնշումը նվազագույնի է հասցնում: Հայերը հմտորեն օգտվում են նրանից, որ ԱՄՆ-ն, Ռուսաստանը, և Ֆրանսիան քրիստոնյա պետություններ են: Այդ իսկ պատճառով, Ադրբեջանը պիտի այնպիսի արտաքին քաղաքականություն վարի, որպեսզի ԱՄՆ-ն, Ռուսաստանը և Ֆրանսիան գոհ մնան:
Ադրբեջանը պետք է Արևմուտքի և Արևելքի միջև կամուրջի դեր ստանձնի, հավասարակշռություն պահպանի քրիստոնյա և մահմեդական աշխարհների մեջ: Եթե Ադրբեջանը պահպանի այդ հավասարակշռությունը, Հայաստանը չի կարողանա օգտվել դրանից»,-ընդգծել է նա:
Մութալիբովը մեկնաբանել է նաև Ֆրանսիայի նախագահ Նիկոլա Սարկոզիի այցը տարածաշրջան, այդ թվում` Ադրբեջան:
«Ես դրական եմ գնահատում այդ այցը: Որովհետև Ֆրանսիայում հայկական լոբբին շատ ուժեղ է: Ֆրանսիայում հայկական լոբբիի ուժը խանգարում է այդ երկրում Ադրբեջանի մասին ճշմարտության տարածմանը: Ադրբեջանը պետք է սերտ համագործակցի Ֆրանսիայի հետ բոլոր ոլորտներում, հատկապես` էներգետիկ: Ֆրանսիայի նավթային և գազային ընկերությունների համար առավել լավ պայմաններ պետք է ստեղծվեն երկրում: Ադրբեջանում նոր հանքավայրերի շահագործման մեջ մեծ մասնաբաժին պետք է պատկանի Ֆրանսիային», – ասել է Մութալիբովը: