Epress.am Լուրեր Հայաստանից
Հայաստանի Սոցապ նախկին փոխնախարար Կարինե Հակոբյանը համոզված է, որ սեռի անցանկալիության պատճառով հղիության դադարեցումը պետք է օրենքով կարգավորվի:
«Անհրաժեշտ է օրենք մշակել, որը կարգելի ծնողներին նախապես իմանալ երեխայի սեռը», – այսօր հրավիրված մամուլի ասուլիսին հայտարարել է Հակոբյանը:
Լրագրողների հետ հանդիպման ժամանակ նա և Հայ-ամերիկյան Առողջության կենտրոնի գինեկոլոգիական բաժնի ղեկավար Մարինա Ոսկանյանը խոսել են հոկտեմբերի 3-ին ԵԽԽՎ աշնանային նստաշրջանում Հայաստանին, Ադրբեջանին, Ալբանիային և Վրաստանին վերաբերող բանաձևի մասին: Հիշեցնենք, որ ԵԽԽՎ-ն ընդունված բանաձևով կոչ է անում վերոնշյալ պետությունների իշխանություններին «հետազոտել սեռերի անհամաչափ հարաբերակցության պատճառներն ու հետևանքները»:
«Հայաստանում աբորտների թիվը միշտ շատ բարձ է եղել. այստեղ մեղավոր են օրենսդրությունը և մեր մենթալիտետը: Կարծում եմ՝ շուտով օրենքի նախագիծ կմշակվի, որը կնախատեսի օրենքով արգելել ծնունդից առաջ սեռի որոշումը», – ասել է Հակոբյանը:
Նա նշել է, որ երեխան սաղմնային վիճակում իսկ ունի իրավունքներ:
«Հայաստանում ոչ թե երեխայի համար են ծնող ընտրում, այլ ծնողի համար՝ երեխա, այնինչ երեխայի իրավունքները գերակա են համարվում»,- ասել է նա:
Գինեկոլոգ Մարինա Ոսկանյանը նշել է, որ, ելնելով իր կենսափորձից, Հայաստանում մարդիկ նույնիսկ առաջնեկի դեպքում ցանկանում են պարտադիր իմանալ երեխայի սեռը:
«Կինը պետք է իմանա, որ ցանկացած հղիության ընդհատում կարող է դառնալ վերջինը, դա կբերի լուրջ առողջական խնդիրների: Աբորտը շատ բացասական երևույթ է», – ասել է Ոսկանյանը: