Epress.am Լուրեր Հայաստանից
Այսօր առավոտյան Երևանում Ֆրանսիայի դեսպանատան մոտ դրվել է առաջին շնորհակալական ծաղկեփունջը, ավելի ուշ ծաղկեփնջերը ավելացել են, ավելացել է նաև մարդկանց հոսքը դեպի դեսպանատուն:
Epress.am-ի հետ զրույցում Ֆրանսիայի դեսպանատան աշխատակիցներից մեկը պատմել է, որ վաղ առավոտյան մի մեքանա կանգնեց դեսպանատան դիմաց, միջին տարիքի տղամարդ մոտեցավ ճաղավանդակներին, վարդերի փունջ թողեց, շնորհակալություն հայտնեց ու հեռացավ:
«Երբ փորձեցինք հետաքրքրվել` ումից է, ասաց՝ հայ եմ»,- պատմել է նա:
Ավելի ուշ դեսպանատան մոտ իրենց շնորհակալությունն են հայտնել ՀՀԿ Երիտթևի, «Միասին» երիտասարդական շարժման, «ՀՅԴ» երիտասարդական միության, «ՀՅԴ Նիկոլ Աղբալյան» ուսանողական միության ներկայացուցիչներ, ուսանողներ, մտավորականներ, հասարակ քաղաքացիներ:
Նրանք այս ակցիայով երախտիքի խոսքն են հայտնել Ֆրանսիային ու խորհուրդ տվել ցեղասպանությունը ժխտող ու հերքող մյուս երկրիներին հետևել Ֆրանսիայի օրինակին:
Կեսօրին մոտ դեսպանատան մոտ են հավաքվել «Բարգավաճ Հայաստան» խմբակցության երիտասարդական թևի ներկայայցուցիչները: Նրանք շտապել են իրենց երախտիքի խոսքը նամակով հանձնել ՀՀ-ում Ֆրանսիայի դեսպան Անրի Ռենոյին:
Մինչ դեսպանը դուրս կգար նրանց ողջունելու, ՀՀԿ, ՀՅԴ ու ԲՀԿ երիտասարդները դեսպանատան մոտ կանգնել են առանձին խմբերով: Նրանք աշխատում էին չխառնել իրենց խմբերը ու ԲՀԿ դրոշով, օրինակ, չկանգնել ՀՀԿ կամ ՀՅԴ-ի ներկայացուցիչների մոտ:
Քիչ ավելի ուշ` անվտանգության աշխատակիցների ուղեկցությամբ, ԲՀԿ-ի երիտասարդական թևի ներկայացուցիներին է մոտեցել դեսպան Անրի Ռենոն, ում երիտասարդ ԲՀԿ-ականները դիմավորել են ծափողջույններով ու «մերսի» վանկարկումներով ու հանձնել իրենց շնորհակալագիրը:
Դեսպանը հայտարարել է, որ տվյալ օրինագիծն ուղղված է պաշտպանելու կենդանի մնացածների տառապանքը:
«Հույս ունենք, որ այս օրինակին կհետևեն ուրիշները ևս»,- ասել է Ռենոն:
