Home / Հայաստան / Պուգաչյովան դեմ չէ Ռուսաստանի առաջին տիկինը դառնալ, բայց «երկար ժամանակով զբաղված է»

Պուգաչյովան դեմ չէ Ռուսաստանի առաջին տիկինը դառնալ, բայց «երկար ժամանակով զբաղված է»

Ռուսաստանի ժողովրդական արտիստուհի, հայտնի էստրադային երգչուհի Ալլա Պուգաչյովան խոստացել է Ռուսաստանի նախագահի թեկնածու Միխայիլ Պրոխորովի համար կին գտնել` միաժամանակ նշելով, որ ինքը դեմ չէր լինի Ռուսաստանի Առաջին տիկինը դառնալ, սակայն չի կարող, որովհետև «երկար ժամանակով զբաղված է»: Այս մասին Պուգաչյովան հայտարարել է մամուլի ասուլիսի ժամանակ:

«Ըստ էության, առաջին տիկինը պետք է ես լինեմ, բայց ես երկար ժամանակով զբաղված եմ: Իսկ իմ նման երկրորդը գտնելը շատ բարդ է»,- ասել է Պուգաչյովան:

Նա նաև նշել է, որ Պրոխորովի համակիրները, այդ թվում և ինքը, կօգնեն նրան հարսնացուի որոնման հարցում:

«Թող անկեղծորեն իր համար արժանի կին գտնի… մենք նրան կօգնենք»,- ասել է երգչուհին:

Ըստ Պուգաչյովայի` Պրոխորովի արժանիքներից մեկը, սակայն, հենց չամուսնացած լինելն է: Նրա կարծիքով` վատ չի լինի, եթե Պրոխորովը որոշ ժամանակ երկրի հետ ամուսնացած լինի, «թե չէ, կգա ինչ-որ մի լեդի, մի բան էն չի ասի, իսկ նա (Պրոխորովը) կրկին մեղավոր կլինի»:

Պատասխանելով լրագրողներից մեկի այն հարցին` արդյոք չի ուզում Պուգաչյովան դառնալ մշակույթի նախարար Պրոխորովի հաղթանակի դեպքում, նա պատասխանել է, որ առհասարակ չի ցանկանում նախարար լինել: