Epress.am Լուրեր Հայաստանից
Նման ընտրություններից հետո եթե որևէ կուսակցություն մտնի խորհրդարան, կնշանակի, որ այդ կուսակցությունը որևէ պարտականություն չունի ՀՀ Սահմանադրության առաջ: Epress.am-ի հետ զրույցում նման կարծիք է հայտնել ՌԱՀՀԿ նախագահ Սամվել Սարգսյանը:
Ըստ նրա` ԱԺ մանդատները վերցնելը նշանակում է որպես նորմալ ճանաչել կեղծիքները: Քաղաքագետը հավելել է, սակայն, որ ընտրությունների կեղծիքները կանխատեսելի էին, քանի որ ներկայիս մթնոլորտից այլ բան սպասել չէր կարելի, և ռեժիմը չէր կարող նորմալ ընտրություններ անցկացնել:
«Ընտրությունների ամենամեծ, կոպիտ խախտումն այն է, որ մարդկանց մասսայական բերում էին ընտրության, մեծ մասշտաբներով ընտրակաշառքներ էին բաժանում, և կուսակցությունները ոչինչ չկարողացան անել ռեժիմի սկսած այդ պրոցեսի դեմ և չէին էլ կարող անել: Ընտրությունների արդյունքները մայիսի 6-ին չէ, որ որոշվել են», – ասել է Սարգսյանը` հավելելով, որ դա տեղի է ունեցել այն ժամանակ, երբ մարդկանց հարկադրաբար բերում էին իշխող ուժի հանրահավաքներին մասնակցելու համար և ընտրակաշառք բաժանում:
Ըստ քաղաքագետի` այն, որ մարդիկ կաշառք են վերցնում, պայմանավորված չէ նրանց խիստ ծանր սոցիալական վիճակով, այլ ընդամենը նրանով, որ մարդիկ ընտրությունների մեջ իմաստ չեն տեսնում: