Home / Հայաստան / Նախագահական ընտրությունները կախված են դրսի ուժերից, ոչ թե Հայաստանի էլեկտորատից. փորձագետ

Նախագահական ընտրությունները կախված են դրսի ուժերից, ոչ թե Հայաստանի էլեկտորատից. փորձագետ

Գալիք նախագահական ընտրություններում, ինչպես 1996 թվականից սկսած բոլոր ընտրություններում, հայ հասարակությունը չի ընտրելու իր նախագահին, սակայն այս ընտրությունների առանձնահատկությունը լինելու է այն, որ ընտրվող նախագահի անձը որոշվելու է մեր երկրից դուրս գտնվող աշխարհաքաղաքական կենտրոններում:

Epress.am-ի հետ զրույցում այս տեսակետն է հայտնել քաղաքական և ընտրական տեխնոլոգիաների փորձագետ Արմեն Բադալյանը:

Նա հասարակության ուժը շատ թուլացած է համարում, և կարծում է, որ այն որոշում չի կայացնի նաև նախագահի հարցում, քանի որ իրեն այս երկրի տերը չի զգում, այս տարածքն ընկալում է որպես ժամանակավոր ապաստան, մինչև կգտնի իրական հայրենիքը:

«Վրաստանի և Հայաստանի հասարակությունների տարբերությունը տեսեք: Վրաստանում բանտում խոշտանգումների սկանդալային տեսահոլովկի հայտնվելուց հետո, բոլոր նույնիսկ փոքր բնակավայրերում բողոքի ակցիաներ եղան, նախարարը, այլ պատասխանատու անձինք ստիպված եղան հրաժարական տալ: Մեզ մոտ Վահան Խալաֆյանի սպանությունից հետո նրա բարեկամները միայն Չարենցավանում ոտքի կանգնեցին»,- ասել է Բադալյանը:

Այս կոնտեքստում, ըստ վերլուծաբանի, էական չէ քննարկել՝ ով է լինելու ընդդիմության թեկնածուն, լինելու է արդյոք միասնական թեկնածու, թե ոչ:

Թեկնածուների հաջողության գրավականը լինելու է ճիշտ աշխարհաքաղաքական ուժի ընտրությունը:

«Ժամանակն է կողմնորոշվեն՝ իրենք արևմտյան ուժերի հետ են տեսնում համագործակցությունը, թե Ռուսաստանի, Եվրամիության, թե Եվրասիական միության անդամ են ուզում դառնալ, քանի որ կոմպլեմենտարության ժամանակն անցել է: ԲՀԿ-ն, օրինակ, այլևս չի կարող ԵԺԿ-ի անդամակցելու դիմում ներկայացնել և գովել Եվրասիական միության գաղափարը: Ընտրությունների արդյունքը կախված է լինելու նրանից, թե ում կողքին կանգնած է նկարվելու Օբաման, Պուտինը»,- ասել է Բադալյանը:

Ըստ վերլուծաբանի՝ այժմ միանշանակ չի կարելի բացառել, որ դրսի ուժերը հստակ չեն պաշտպանի այս կամ այն թեկնածուին, ինչը չեն արել նույնիսկ 2008 թվականին:

Այժմ Արևմուտքը և Ռուսատանը հստակ են արտահայտվում, օրինակ, Սիրիայի նախագահ Ասադի հարցում՝ առաջինն ասում է, որ նա պետք է հեռանա, իսկ Ռուսաստանն ու Չինաստանը բացահայտ սատարում են նրան:

Բադալյանը բացառում է, որ Հայաստանում Արևմուտքը կամ Ռուսատանը խաղադրույքներ կատարեն ՀՅԴ-ի կամ «Ժառանգության» վրա: Դրա լուրջ հավակնություններն ունեն միայն ՀԱԿ-ը, ՀՀԿ-ն և ԲՀԿ-ն:

«Այս երեքը նախագահական ընտրություններում հաջողություն ունենալու համար պետք է պայքարեն դրսի ուժերին գրավելու, այլ ոչ թե հայ էլեկտորատին հաճոյանալու համար», – կարծում է Արմեն Բադալյանը: