Home / Հայաստան / ՀԱԿ-ի ակտիվիստն ասել է՝ որտեղ փնտրել ոստիկանների գործողությունների քաղաքական ենթատեքստը

ՀԱԿ-ի ակտիվիստն ասել է՝ որտեղ փնտրել ոստիկանների գործողությունների քաղաքական ենթատեքստը

Հայ Ազգային Կոնգրեսի չորս երիտասարդների գործով մեղադրող դատախազ Հակոբ Մարտիրոսյանն այսօր Վերաքննիչ քրեական դատարանում հայտարարել է, որ առաջին ատյանի դատարանի կողմից կայացրած դատական ակտը պետք է թողնել անփոփոխ, բացառությամբ Դավիթ Քիրամիջյանի: Նշենք, որ այդ վճռով Տիգրան Առաքելյանը դատապարտվել է 6 տարվա ազատազրկման, Արտակ Կարապետյանը՝ 3, իսկ Սարգիս Գևորգյանը և Դավիթ Քիրամիջյանը՝ 2-ական:

Հիշեցնենք, որ դատախազը Քիրամիջյանի համար պահանջել էր երկու տարվա պայմանական ազատազրկում, մինչդեռ դատավոր Գագիկ Պողոսյանը որոշել էր պատիժը կիրառել ողջ խստությամբ:

Իր այսօրվա խոսքում դատախազը, անդրադառնալով Տիգրան Առաքելյանի փաստաբան Վահե Գրիգորյանի բողոքի այն կետերին, որտեղ վերջինիս կողմից նշված էին գործում առկա խախտումները, նշել է, որ դրանք դատաքննության առարկա չեն: Դա վերաբերում էր մի քանի խախտումներին, մասնավորապես, նրան, որ միջադեպի օրը երիտասարդ ակտիվիստների փաստաբան Վահե Հովսեփյանի նկատմամբ բռնություն են կիրառել ոստիկանության բաժանմունքում և խոչընդոտել են նրա աշխատանքը:

Կամ՝ դատարանում ցուցմունք տվող բոլոր ոստիկանները նշել են, որ այնտեղ տեսել են Սարգիս Գևորգյանի քրոջը՝ լրագրող Անի Գևորգյանին, բայց Գրիգորյանն իր բողոքում նշում է, որ Անի Գևորգյանն այնտեղ չի եղել:

Խոսելով փաստաբանի այն դիտարկման մասին, թե երիտասարդների նկատմամբ քաղաքական հետապնդում է իրականացվում, Մարտիրոսյանն ասել է, որ վարույթն իրականացնող մարմինն իր գործողությունները չի իրականացնում ելնելով այն սկզբունքից, թե ով որ խմբից է:

Մեղադրյալներից Սարգիս Գևորգյանը, անդրադարձ կատարելով դատախազի այդ դիտարկմանը, մի քանի օրինակ է բերել առ այն, որ ոստիկաններն իրականում բավականաչափ քաղաքականացված են:

Գևորգյանի խոսքով՝ միջադեպի օրը բազմաթիվ ոստիկաններ իրենց ցուցմունքներում նշել են, որ իրենք երիտասարդներին գիտեին հանրահավաքներից ու ակցիաներից, իսկ միջադեպի օրը՝ օգոստոսի 9-ին, կարմիր բերետավորների գործողությունները ղեկավարել է այն ժամանակ Երևանի փոխոստիկանապետի պաշտոնը զբաղեցնող Ռոբերտ Մելքոնյանը, ով հայտնի է իր քաղաքական հայտարարություններով::

Որպես օրինակ ակտիվիստը մեջբերել է Մելքոնյանի հարցազրույցներից մեկը, որի ժամանակ նա նշել էր, թե իր կարգախոսը «Առաջ, Հայաստանն» է՝ ընդգծելով, որ ինքն արել է ամեն ինչ, որ իր կարգախոսը հաղթի ընդդիմության «Պայքար, պայքար մինչև վերջ» կարգախոսին:

«Այսինքն՝ անուղղակի, թե ուղղակի իր գործողությունները քաղաքական ենթատեքստ ու պատճառներ ունեն: Դա հերթական ապացույցն է այն բանի, որ մեր նկատմամբ հետապնդումը բացառապես քաղաքական հետապնդում է», – ասել է Սարգիս Գևորգյանը:

Նշենք, որ դատական նիստի ընթացքում դատախազ Հակոբ Մարտիրոսյանը նաև դժգոհ է եղել Տիգրան Առաքելյանի հայտարարություններից մեկից: Երբ վերջինիս մեղադրում էին իրեն բերման ենթարկող ոստիկան Տիգրան Ավետիսյանի քիթը կոտրելու մեջ, Առաքելյանը նշել էր, որ ինքը դիտավորություն չի ունեցել ոստիկանի քիթը կոտրել, հնարավոր է քիթը կոտրվել է մեքենայի դռան տակ մնալու հետևանքով:

«Այն, որ ես ասել եմ, որ ոստիկանի քիթը մնացել է մեքենայի դռան տակ, ես ենթադրություններ էի անում: Նույն կերպ կարող էի ենթադրել, որ ոստիկանի քթին հարվածել ու այն կոտրել է Ալիկ Սարգսյանը (միջադեպի պահին ՀՀ ոստիկանապետ – խմբ.)», – ասել է Տիգրան Առաքելյանը:

Հաջորդ դատական նիստը կկայանա նոյեմբերի 2-ին, ժամը 13.00-ին:

Այդ նիստի ժամանակ հայտարարությամբ հանդես կգա երիտասարդների փաստաբան Վահե Գրիգորյանը: