Հայտարարությունների պայքար. Հովհաննիսյանն ու Քոքոբելյանը շարունակում են մեղադրել միմյանց

«Ժառանգություն» և «Ազատ դեմոկրատներ» կուսակցության նախագահներ Րաֆֆի Հովհաննիսյանի և Խաչատուր Քոքոբելյանի հակամարտությունը երեկ շարունակվել է հայտարարությունների միջոցով: Հիշեցնենք, որ խնդիրները ծագել էին այն ժամանակ, երբ Հովհաննիսյանը նշել է, թե Քոքոբելյանը խախտել է պայմանավորվածությունը և խորհրդարանական ընտրություններից հետո չի հետևել իր օրինակին, և վայր չի դրել մանդատը:

Կողմերը նախօրեին հանդիպել էին, և պայմանավորվել խնդիրները քննարկել «Ժառանգություն» խմբակցության («Ազատ դեմոկրատները» խմբակցության մաս են կազմում – խմբ.) համատեղ նիստում:

Երեկ, սակայն, Րաֆֆի Հովհաննիսյանը «Ճշմարտությունը` ամեն ինչից բարձր» վերնագրով հայտարարություն է տարածել, որում նշված է, թե «Խաչատուր Քոքոբելյանն անձամբ հրապարակեց իր սուտը, այն էլ` հերթականը, ինչի համար մեծ ցավ եմ ապրում»:

«Ցավ եմ զգում հատկապես այն հրաշալի, խոստումնալից երիտասարդների համար` «Ազատ դեմոկրատներից», «Ժառանգությունից» և քաղաքացիական հոսանքներից, ովքեր անմնացորդ նվիրվեցին նախորդ ընտրարշավին:

Համատեղ պայքարը սխալ չէր. նորամուծություն էր և որոշ չափով` ռիսկային, բայցև հիմնավոր ու ապագայամետ:

Սխալն ընդամենը մեկ մարդու խաբեությունն է ու նաև մյուսների չհիմնավորված վստահությունը «տղամարդու»` նրա խոսքի նկատմամբ:

Այդ մեկը` եթե երբևէ եղել է, արդեն չկա: Մնացածը նրա և Աստծո օրենքի միջև է:

Քաղաքական նպատակահարմարությունից դրդված` կարող էի լռել: Համբերատար սպասելուց հետո, սակայն, նախընտրեցի հռչակել ճշմարտությունը` որպես պատասխանատվության պահանջ իմ համաքաղաքացիների առջև:

Եվ վերջում` նրա սատարումը որևէ հարցում ցանկալի չէ», – նշել է Հովհաննիսյանը:

Պատասխան հայտարարության մեջ Խաչատուր Քոքոբելյանն ափսոսանք է հայտնում «Րաֆֆի Հովհաննիսյանի՝ պահի թելադրանքով արված, հուզական հայտարարության կապակցությամբ»:

«Եվս մեկ անգամ հարկ եմ համարում հիշեցնել, որ ընդհանուր խմբակցության մաս կազմելը բնավ չի նշանակում անկախ քաղաքական ուժի մանդատների միանձնյա տնօրինում, մեկ այլ անհատի կողմից: Ցավում եմ, որ ընդդիմադիր դաշինքը կայացնելու մեր բոլոր ջանքերն ու ներդրումները հետևողականորեն փոշիացվում են անհասկանալի դրդապատճառներով», – նշել է Քոքոբելյանը: