Epress.am Լուրեր Հայաստանից
Եվրամիությունը շատ մեծ կարևորություն է տալիս Արևելյան գործընկերություն ծրագրում ընդգրկված երկրների հետ համագործակցությանը: Այս մասին լրագրողների հետ հանդիպմանն այսօր ասել է Լիտվայի արտգործնախարար Լինաս Լինկյավիչյուսը, ով պաշտոնական այցով գտնվում է Հայաստանում:
«Մենք պետք է Հայաստանի հետ համագործակցության հարցում շոշափելի արդյունքներ ունենանք մինչև ԵՄ հաջորդ գագաթնաժողովը: Ինչ վերաբերում է Արևելյան գործընկերության մյուս երկրներին, ապա ամեն երկրից մենք տարբեր ակնկալիքներ ունենք», – ասել է Լինկյավիչյուսը՝ նշելով, որ մինչ գագաթնաժողովը Հայաստանի համար առաջնահերթություն պետք է լինի ԵՄ-Հայաստան ասոցացման համաձայնագիրը վերջնական տեսքի բերելը:
Պատասխանելով Epress.am-ի հարցին, թե ինչ կարծիք ունի Հայաստանում կայացած նախագահական ընտրությունների մասին և կիսում է արդյոք ԵԱՀԿ/ԺՀՄԻԳ-ի դիտորդական առաքելության հրապարակած մտահոգությունները՝ Լիտվայի ԱԳ նախարարն ասել է, որ ծանոթ է վերջին միջանկյալ զեկույցին, համաձայն է, որ եղել են ընտրախախտումներ, սակայն պետք է նկատել, որ ընտրությունների կազմակերպման հարցում առաջընթաց ևս գրանցվել է:
Լինկյավիչյուսն ասել է, որ հետընտրական զարգացումները չեն կարող խոչընդոտ հանդիսանալ ԵՄ-ի և Հայաստանի իշխանությունների միջև հետագա համագործակցության համար: