Home / Հայաստան / Փաշինյանը կոչ է արել քվեարկել ընդդիմության օգտին, խոսել է «հականիկոլական» քարոզարշավի մասին

Փաշինյանը կոչ է արել քվեարկել ընդդիմության օգտին, խոսել է «հականիկոլական» քարոզարշավի մասին

ԱԺ ՀԱԿ խմբակցության պատգամավոր Նիկոլ Փաշինյանը անդրադարձել է այսօր ԱԺ-ում «Հայ Ազգային Կոնգրես» կուսակցության և իր մասին հնչած հայտարարությանը, որի հեղինակն է եղել ՀՀԿ-ական Կարեն Ավագյանը: Փաշինյանը իր կարծիքը հրապարակել է nikol.am կայքում:

«ԱԺ այսօրվա հայտարարությունների ժամին ՀՀԿ խմբակցության անդամ Կարեն Ավագյանը ԱԺ ամբիոնից կեղծված ապրանքանիշ որակելով նորաստեղծ ՀԱԿԿ-ն, ասել է. «ՀԱԿ-ին փորձեց փոխարինել ՀԱԿԿ-ն, բայց առանց Նիկոլի. զգուշացեք կեղծիքներից, իսկական ՀԱԿ-ը Նիկոլ Փաշինյանով է»:

Առաջին հայացքից տարօրինակ այս հայտարարությունը հասկանալի է դառնում, երբ այն դիտարկում ենք վերջին ամիսներին իմ համեստ անձի նկատմամբ ընդդիմադիր և այլընտրանքային կողմերից ծայր առած բանսարկությունների արշավի ֆոնին:

Թերևս տեսնելով, որ իրենց բանսարկությունները ցանկալի էֆեկտ չեն ունենում, «հականիկոլական» քարոզարշավի հեղինակները որոշել են օգնության կանչել իրենց հին զինակիցներին կամ ընթացիկ խնամիներին, որոնք էլ գործի են դրել իրենց երիտասարդ ակտիվը՝ հակադիր դաշտում գտնվող հայտնի շրջանակների հետ «պասերով» խաղալու համար», – նշում է Նիկոլ Փաշինյանը:

Նա հիշեցնում է, որ խոստում է տվել իր անձի հետ կապված որևէ հարց չթողնել առանց հրապարակային պարզաբանման:

«Այս պահին հարկ եմ համարում ընդգծել միայն հետևյալը.

ա) Իսկական Հայաստանը առանց Սերժ Սարգսյանի է, և առանց 2008 թվականի Մարտի 1-ի մյուս կամ մույս ոճրագործների ու նրանց ախքակերպ սպասարկուների:

բ) Իսկական Երևանը առանց Տարոն Մարգարյանի է և նրա հետ համատեղ՝ մայրաքաղաքը անմիտ բետոնակույտերի վերածած քրեական օլիգարխիայի:

Հաշվի առնելով, որ առաջիկա կիրակի օրը տեղի են ունենալու Երևանի ավագանու ընտրություններ, երևանցիներին կոչ եմ անում ակտիվորեն մասնակցել ընտրություններին, քվեարկել ընդդիմության օգտին և վճռականորեն ոչ ասել ա) և բ) կետերում նշված սուբյեկտներին:

Վերահաստատելով 2007, 2008 թվականներին և դրանից հետո Հայաստանի հանրության առաջ ստանձնած պարտավորություններս՝ Հայաստանում և արտերկրում գտնվող ՀՀ քաղաքացիներին կոչ եմ անում պատրաստ լինել Հաղթական քաղաքացիական-քաղաքական պայքարի», – հայտարարել է Փաշինյանը: