Epress.am Լուրեր Հայաստանից
Այսօր ՀՀ կառավարության շենքի մոտ անցկացվող ազատամարտիկների բողոքի ակցիայի ժամանակ Քաղաքացիների ընդունելության ու դիմումների քննարկման վարչության պետ Ալեքսանդր Ղազարյանը խնդրել է բողոքողներին ևս մեկ օր սպասել, ինչը առաջացրել է մի քանի ազատամարտիկների զայրույթը: Նրանց չի գոհացրել այն խոստումը, որ վաղը կառավարությունում իրենց պատրաստ են ընդունել և քննարկումներ անցկացնել:
«25 տարի համբերել ենք, էլ չենք կարա, չկա, դու համբերում ես, կարաս տուն գնաս, մենք չենք համբերում», – ազատամարտիկ կանացից մեկը զայրացած ասել է մեկ այլ ազատամարտիկի, ով հորդորել է մեկ օր էլ սպասել:
Վերջինս հարցրել է Ղազարյանին, թե ինչո՞ւ է վարչապետի կամ նախագահի փոխարեն ինքը հանդիպում բողոքող ազատամարտիկներին:
«Ժողովուրդը եկել ա, խնդրում ա, ուզում ա վարչապետին տեսնի, խոսի, տղամարդավարի թող գա, ինչի՞ ա վախենում, ինչքա՞ն կարելի ա», – հարցրել է ազատատամարտիկներից մեկը, ինչին ի պատասխան Ղազարյանն ասել է՝ «դրա համար էլ հրավիրում ա իր մոտ»:
Ազատամարտիկները բողոքել են, որ ի վիճակի չեն անընդհատ գնալ ու գալ՝ բոլորը հաշմանդամ են ու կարիքավոր:
«Արդեն սովամահ ենք լինում, ռուսի զավտրա, պոսլեզավտրան ա, դրանով հարց չի լուծում, այ ախպեր», – հակադարձել բողոքողներից մեկը:
Ակցիայի մեկ այլ մասնակից, ում ոտքը ծնկից անդամահատված էր, բորբոքված հարցրել է՝ ինչպե՞ս է մուծելու կոմունալ ծախսերը, ամեն ինչ թանկանում է:
«Եթե դու կարում ես հոսանքը, գազը, ջուրը թանկացնես, ինչի՞ թոշակը չես կարում բարձրացնեք, քո վարչապետով, պրեզիդենտով համատեղ ուտում եք էս ժողովրդի արյունը, ծծում եք, ծծում», – բորբոքված կրկնել է հաշմանդամ ազատամարտիկը, այնուհետ, հենակը մեկնելով Ղազարյանին, բղավել՝ «էս էլ տա՞մ քեզ, ասա, տա՞մ, տար, կեր»:
Ղազարյանի՝ վաղվա հանդիպման մասին խոստումից զայրացած ատամարտիկները կոչ են արել իրենց մարտական ընկերներին առանց որևէ մեկնաբանության վերադառնալ Ազատության հրապարակ ու ծրագրել հետագա անելիքները:
Ազատության հրապարակում նրանք որոշում են կայացրել վաղը 5 հոգանոց պատվիրակություն ուղարկել ՀՀ կառավարություն: Հիշեցնենք, որ ազատամարտիկները, մասնավորապես, պահանջում են բարձրացնել իրենց թոշակները, ապահովել անվճար բուժօգնություն: