Home / Հայաստան / ԱԺ Էթիկայի հանձնաժողովը մերժել է Սամվել Ալեքսանյանի պահվածքի վերաբերյալ դիմումը

ԱԺ Էթիկայի հանձնաժողովը մերժել է Սամվել Ալեքսանյանի պահվածքի վերաբերյալ դիմումը

Մայիսի 30-ին ՀՀ Ազգային ժողովի Էթիկայի հարցերով ժամանակավոր հանձնաժողովը մերժել է Թրանսփարենսի Ինթերնեշնլ հակակոռուպցիոն կենտրոնի (ԹԻՀԿ) դիմումի քննարկումը ԱԺ ՀՀԿ խմբակցության պատգամավոր Սամվել Ալեքսանյանի կողմից էթիկայի կանոնները խախտելու վերաբերյալ՝ դիմումում առաջադրված հարցերը Հանձնաժողովին ենթակա չլինելու պատճառաբանությամբ:

ԹԻՀԿ-ից հայտնում են, որ հանձնաժողովն իր որոշմամբ եկել է այն եզրահանգման, որ դիմումում առկա են միայն պնդումներ Սամվել Ալեքսանյանի կողմից էթիկայի կանոնները խախտելու մասին, «սակայն բացակայում է այդպիսի խախտումը (խախտումները) հավաստող որևէ առեևրույթ հիմնավորում (խախտումը հավաստող փաստաթուղթ, այդ թվում՝ ապացույց)»:

Մայիսի 24-ին ԹԻՀԿ-ն դիմել էր Հանձնաժողովին՝ խնդրելով քննության առնել Երևանի ավագանու ընտրություններին թիվ 8/08 ընտրատեղամասում պատգամավոր Սամվել Ալեքսանյանի կողմից ընտրական գործընթացին միջամտելու և տեղամասում «կարգուկանոն հաստատելուն» ուղղված վարքագծի համապատասխանությունը պատգամավորի էթիկայի կանոններին և, որպես ապացույց, հղում էր կատարվել համացանցում առկա տեսանյութին:

Հանձնաժողովը նշված տեսանյութը համարել է «դիմումի պնդումների հետ որևէ կապ չունեցող», մինչդեռ տեսանյութից ակնհայտ է, որ պատգամավորը ընտրատեղամաս է եկել ընտրական գործընթացի նկատմամբ հսկողություն իրականացնելու, ինչը հաստատում է անձամբ ինքը՝ պատգամավորը՝ պատասխանելով լրագրողի հարցին: