Անմեղ զոհերի հիշատակին նվիրված հուշարձանների մասին

2013 թվականի սեպտեմբերին Երևանում հուշարձան են կանգնեցրել Հայաստանի Զինված ուժերի սպա Գուրգեն Մարգարյանի հիշատակին, ով 2004 թվականին Բուդապեշտում դաժանաբար սպանվել էր ադրբեջանցի զինծառայող Ռամիլ Սաֆարովի կողմից: Այս իրադարձության հետ կապված՝ առաջարկում եմ հուշարձաններ կանգնեցնել նաև հետևյալ մարդկանց հիշատակին.

Զարուհի Պետրոսյան ու ընտանեկան բռնության այլ անմեղ զոհեր

20-ամյա Զարուհի Պետրոսյանը մահացել է ամուսնու ու սկեսրոջ կողմից պարբերաբար ծեծի ենթարկվելու հետևանքով: 2010 թվականի հոկտեմբերի 1-ին ամուսինն ու նրա մայրը հերթական անգամ դաժան ծեծի էին ենթարկել Զարուհուն, կոտրել նրա մատները, այնուհետև հրելով վայր գցել աստիճաններից՝ դեպքը ներկայացնելով որպես դժբախտ պատահար:

Լևոն Ղուլյան

Լևոն Ղուլյանը մահացել է 2007 թվականի մայիսին՝ ոստիկանական բաժանմունքում հարցաքննությունից հետո: Ըստ պաշտոնական վարկածի՝ նա մահացել է փախուստի փորձ կատարելու ժամանակ՝ դուրս նետվելով ոստիկանության շենքի երկրորդ հարկի պատուհանից: Ղուլյանի հարազատներն ու իրավապաշտպանները, սակայն, ապացույցներ են ներկայացնում, որ նրան ստորացրել ու դաժան խոշտանգումների են ենթարկել ոստիկանական բաժանմունքում:

Վահան Խալաֆյան ու ոստիկանության անօրինականության այլ զոհեր

24-ամյա Վահանը բերման էր ենթարկվել Չարենցավան քաղաքի ոստիկանական բաժանմունք՝ գողություն կատարելու կասկածանքով: 2010 թվականի ապրիլին նա ենթարկվել էր դաժան ծեծի ու մահացել: Սկզբնական շրջանում հետաքննությունը պնդում էր, որ կասկածյալը ինչ-որ կերպ դանակ էր հայթայթել, ինքն իրեն խոշտանգել ու դանակի բազմաթիվ հարվածներ հասցրել: Նույն տարվա նոյեմբերին ոստիկանության երկու աշխատակիցներ դատապարտվեցին՝ Խալաֆյանին բռնության միջոցով ինքնասպանության հասցնելու մեղադրանքով:

Արտակ Նազարյան

Լեյտենանտ Արտակ Նազարյանը 2010 թվականի հուլիսի 27-ին դաժան ծեծի էր ենթարկվել ու գնդակահարվել Տավուշի մարզի զորամասերից մեկում: Դատարանն ու հետաքննությունն անընդհատ արհամարհում էին հարազատների՝ սպանության փաստի առնչությամբ գործ հարուցելու պահանջը: Սպանության մասին էին վկայում անկախ փորձագետների հավաքած բազմաթիվ ապացույցները: Մի քանի սպաներ ու զինծառայողներ դատապարտվել են «ինքնասպանության հասցնելը» հոդվածով:

Հայկ Խաչատրյան ու բանակում ամենաթողության այլ զոհեր

Զինծառայող Հայկ Խաչատրյանը մահացել է Երևանի հիվանդանոցներից մեկում՝ սուր ջրծաղիկի հետևանքով, որը վնասել էր երիտասարդի ներքին օրգանները: Մահից երկու օր առաջ՝ 2011 թվականի դեկտեմբերի 28-ին, հայրը որդուն լքված վիճակում գտել էր հոսպիտալի սենյակներից մեկում: Բժիշկները հրաժարվել են Հայկին տեղափոխել ինֆեկցիոն հիվանդանոց՝ պնդելով, որ բորբոքված էր նրա կույրաղիքը, իսկ ուժեղ ցավերն ու նոպաները բացատրել հիվանդի մոտ առկա հնարավոր էպիլեպսիայով:

Գոռ Քլոյան ու Մարտի 1-ի այլ զոհեր

Քլոյանը մահացել է Երևանի կենտրոնում ցույցը ցրելու ժամանակ ոստիկանության կողմից կիրառված «Չերեմուխա 7» հատուկ միջոցից:

Անմեղ զոհված հայերի հիշատակը հավերժացնելու մեկ այլ նախաձեռնությամբ հանդես է եկել Հայ Առաքելական եկեղեցին, որը հայտարարել է Օսմանյան կայսրությունում Հայոց ցեղասպանության զոհերին սրբերի շարքին դասելու մտադրության մասին:

Յուրի Մ., Epress.am-ի համախմբագիր