Home / Տեսանյութեր / Բանակային գործ. քննիչը պաշտպանական կողմի հարցերին չի պատասխանել (ՏԵՍԱՆՅՈՒԹ)

Բանակային գործ. քննիչը պաշտպանական կողմի հարցերին չի պատասխանել (ՏԵՍԱՆՅՈՒԹ)

Դատարան ներկայացած քննչական խմբի ղեկավարը հայտարարել է, որ իր գործողությունները համապատասխանում են ՀՀ օրենսդրությանը: Ավելի վաղ բանակային գործով դատավարության ընթացքում վկան բարձրաձայնել էր խախտումների մասին:

Նոյեմբերի 19-ին Տավուշի մարզի ընդհանուր իրավասության դատարանում շարունակվել է Արտակ և Կառլեն Սարգսյանների և Մանուկ Մարգարյանի նկատմամբ հարուցված քրեական գործի քննությունը: Հիշեցնենք, որ ըստ մեղադրանքի՝ զինծառայող եղբայրներ Կառլեն և Արտակ Սարգսյանները ու Մանուկ Մարգարյանը ծեծի են ենթարկել լեյտենանտ Դավիթ Մկրտչյանին: Մեղադրյալները պնդում են, թե Մկրտչյանն առաջինն է հարվածել, որից հետո Կառլենը մեկ պատասխան հարված է հասցրել, իսկ մյուս երկու զինծառայողները փորձել են հաշտեցնել նրանց:

Դատավոր Ռաֆիկ Մելքոնյանը, նախորդ դատական նիստին ավարտելով քրեական գործի նյութերի ուսումնասիրությունը, դատաքննությունը լրացնելու պատճառաբանությամբ որոշել էր դատարան հրավիրել և հարցաքննել քննչական խմբի ղեկավար Դավիթ Ֆրջյանին, ով ներկայացել էր դատարան:

Ինչպես հաղորդում է «Հելսինկյան ասոցիացիա» իրավապաշտպան կազմակերպության դիտորդ Արման Վեզիրյանը, Ֆրջյանը, բնականաբար, հայտնել է, որ քննչական գործողություններն իրականացվել են ՀՀ քրեական դատավարության օրենսգրքի դրույթներին համապատասխան, մինչդեռ պաշտպանական կողմի և դատարանի հարցերին քննչական խմբի ղեկավարը կոնկրետ պատասխաններ չի տվել: Հիշեցնենք, որ ավելի վաղ գործում ներգրավված վկա Արմեն Նազարյանը հայտնել էր, որ իրեն սպառնալով ստիպել են սուտ ցուցմունք գրել:

Նշենք նաև, որ դատական նիստին չէր ներկայացել տուժողը. հաջորդ նիստին նրա մասնակցությունը ապահովելու համար կայացվել է բերման ենթարկելու որոշում:

Մանրամասները՝ Արման Վեզիրյանի տեսանյութում