Home / Տեսանյութեր / «Այդ ո՞ր հիմարի որոշումն է»․ Հայաստանը աշխատանքի է վերադառնում արձակուրդից հետո

«Այդ ո՞ր հիմարի որոշումն է»․ Հայաստանը աշխատանքի է վերադառնում արձակուրդից հետո

Այսօր Հայաստանի Հանրապետությունն աշխատանքի է դուրս գալիս 11-օրյա ընդմիջումից հետո։ ԱԺ պատգամավոր, ՀՀ նախկին վարչապետ Հրանտ Բագրատյանը համարում է, որ 11 օր արձակուրդն ավելորդ շռայլություն է երկրի համար։

«Պատկերացնու՞մ եք մի աղքատ երկիր, որը գոյատևելու խնդիր ունի և մի կերպ քարշ է տալիս իր գոյությունը 11 օր…… հանգստանում է։ Որքան անպատասխանատու, պոֆիգիստ ու հիմար պետք է լինել նման որոշումներ կայացնելու համար։ Կոլեկտիվ սովորում ենք ծուլությանը։ Մեզ աշխատել պետք չէ, մեր աշխատանքն էլ պետք չէ», – Facebook սոցիալական ցանցի իր էջում գրել է Հրանտ Բագրատյանը։

Վերջինս ստեղծված իրավիճակը համեմատում է Ֆրանսիայի նախկին նախագահ Ֆրանսուա Միտերանի (պաշտոնավարել է 1981-1995թթ․) կայացրած որոշման հետ։

«Ֆրանսիան մի շատ խելացի ու խորամանկ նախագահ ուներ՝ սոցիալիստ Ֆրանսուա Միտերանը։ Սա այնքան խորամանկ էր, որ մի օր երկու ոտքով թակարդն ընկավ. ինչպես ինքը, այնպես էլ ֆրանսիական ժողովուրդը։ Ուրեմն սա 90-ականների կեսերին (մոտավորապես) աշխատանքային շաբաթը սարքեց 35 ժամ (40-ից)։ Ու վերջ, ֆրանսիական տնտեսությունը տարին տարվա վրա վատանում է։ Մինչ այդ Եվրոպայի լավագույն տնտեսություններից մեկը ներկայումս զիջում է Գերմանիային, Մեծ Բրիտանիային, Շվեդիային, Ֆինլանդիային, Դանիային, Հոլանդիային, Բելգիային, Ավստրիային և այլն։ Գլոբալ մրցակցության պայմաններում հնարավոր չէ 35 ժամյա աշխատանքային շաբաթով առաջ գնալ։ Ոչ Սարկոզին, ոչ էլ առավել ևս Օլանդը չկարողացան այդ անպատասխանատու որոշումը փոխել։ Ինչպես ասում են՝ մի հիմար փոսը քար է գցում, 100 խելոք չեն կարողանում հանել։ Հիմա մերն է։ Այդ 11 օրից առնվազն 8-ը ավելորդ շռայլություն է։ Դե սա արդեն 64 ժամ է։ Սա արդեն հերիք է ասելու, որ ՀՀ-ում 2014-ին միջին աշխատանքային շաբաթվա տևողությունը լինելու է 38,8 ժամ։ Մնում է գտնել, թե Հայաստանի պարագայում այդ ո՞ր հիմարի որոշումն է», – գրել է Բագրատյանը։