Home / Հայաստան / Փաշինյանը բացատրել է՝ ինչու է դուրս եկել դահլիճից Մարտի 1-ի զոհերի հիշատակի լռության րոպեից առաջ

Փաշինյանը բացատրել է՝ ինչու է դուրս եկել դահլիճից Մարտի 1-ի զոհերի հիշատակի լռության րոպեից առաջ

ԱԺ ՀԱԿ խմբակցության պատգամավոր Նիկոլ Փաշինյանը չի մասնակցել Մարտի 1-ի զոհերի հիշատակի լռության րոպեին՝ դուրս գալով դահլիճից։ Զոհերի հիշտակը մեկ րոպե լռությամբ հարգել առաջարկել է ՀՀԿ խմբակցության պատգամավոր Մարգարիտ Եսայանը, իսկ Facebook սոցիալական ցանցի իր էջում Փաշինյանը բացատրել է՝ ինչու է նման քայլի դիմել։

«Քիչ առաջ ՀՀԿ խմբակցության պատգամավոր Մարգարիտ Եսայանը ԱԺ նիստի ընթացքում առաջարկեց մեկ րոպե լռությամբ հարգել Մարտի 1-ի զոհերի հիշատակը:

Ներկաները ոտքի կանգնեցին: Ես չմասնակցեցի լռության րոպեին և դուրս եկա դահլիճից, որովհետև այսօր ԱԺ դահլիճում նստում են մարդիկ, ովքեր ուղղակի կապ ունեն Մարտի 1-ի սպանությունների կազմակերպման և իրագործման հետ, մարդիկ, ով անձամբ տվել են ՀՀ քաղաքացիներին գնդակահարելու հրամաններ, բացառված չէ անգամ՝ գտնվեն անմիջական կատարողներ:

Նրանց հետ կողք-կողքի Մարտի 1-ի զոհերի հիշատակի լռության րոպեին մասնակցելը, իմ ընկալմամբ, անարգանք կլիներ զոհերի հիշատակի առաջ: Այս մասին կխոսեմ նաև իմ ելույթում», – գրել է Փաշինյանը: