Ծխախոտի և ալկոհոլի գովազդները նորից ԶԼՄ-ներում թույլ տալու մասին օրինագիծն ընդամենը լոբբինգ է որոշ գործարար շրջանակների կողմից, որոնց ընդառաջ են գալիս որոշ պատգամավորներ: Այս մասին այսօր ԱԺ-ում «Գովազդի մասին» ՀՀ օրենքի խմբագրման նախագծի քննարկմանն ասել է ՀԱԿ խմբակցության քարտուղար Արամ Մանուկյանը (լուսանկարում):
Նա ասել է, որ հարցը քննարկելը միայն ամոթ է, քանի որ ողջ քաղաքակիրթ աշխարհը գնում է ալկոհոլի և ծխախոտի գովազդի վերացմանը, իսկ մեզ մոտ առաջարկվում է հակառակը:
Մանուկյանի խոսքով` ՀՅԴ, ՀԱԿ և Ժառանգություն խմբակցությունները հանձնաժողովի նիստում օրինագծին դեմ են քվեարկել:
Օրինագծի դեմ ելույթ է ունեցել նաև ԲՀԿ խմբակցության պատգամավոր Տիգրան Ուրիխանյանը: Նա ընդունել է, որ ԶԼՄ-ներին անհրաժեշտ է ֆինանսական անկախություն՝ գովազդի միջոցով, սակայն դա չպետք է արվի այս եղանակով, քանի որ օրինագծի հիմքում ոչ թե ԶԼՄ-ների իրավունքներն են, այլ բիզնեսմենների:
Հիշեցնենք, որ ՀՀԿ-ական պատգամավորներ Արման Սահակյանի, Սամվել Ֆարմանյանի, Նաիրա Կարապետյանի, Տաճատ Վարդապետյանի, Լևոն Մարտիրոսյանի և անկախ պատգամավոր Էդմոն Մարուքյանի նախագիծը առաջարկում է թույլ տալ տեղական արտադրության կոնյակի գովազդը: