Home / Հայաստան / Հայաստանում ՌԴ դեսպան․ «Ընդդիմադիրներից գրեթե ոչ ոք դեմ չէ ԵՏՄ֊ին»

Հայաստանում ՌԴ դեսպան․ «Ընդդիմադիրներից գրեթե ոչ ոք դեմ չէ ԵՏՄ֊ին»

Հայաստանի ներքին քաղաքական զարգացումները, ամենայն հավանականությամբ, չեն կարող էական ազդեցություն ունենալ երկրի արտաքին քաղաքականության ուղղվածության վրա: «Ազատության» հետ զրույցում նման հայտարարություն արեց Հայաստանում Ռուսաստանի դեսպան Իվան Վոլինկինը՝ ընդգծելով, որ, ըստ հոկտեմբերի 24-ի հանրահավաքում հնչած ընդդիմադիրների ելույթների՝ գործնականում ոչ ոք դեմ չէ Եվրասիական տնտեսական միությանը (ԵՏՄ) Հայաստանի անդամակցությանը, բացառությամբ մեկ ուժի։

Ոչ իշխանական եռյակի հանրահավաքին չշրջանցվեց ԵՏՄ-ին Հայաստանի անդամակցության թեման: Միայն «Ժառանգություն» կուսակցության առաջնորդ Րաֆֆի Հովհաննիսյանը դեմ արտահայտվեց Հայաստանի անդամակցությանն այս կառույցին։

«Սերժ Սարգսյանը, որպես ոչ լեգիտիմ պաշտոնյա, իր առոչինչ ստորագրությամբ, Հայաստանը տանում է սխալ ուղղությամբ», – հայտարարեց «Ժառանգության» նախագահը։

Մինչդեռ Հայ ազգային կոնգրեսի առաջնորդ Լևոն Տեր-Պետրոսյանն իր ելույթում շեշտեց, որ անդամակցությունն արդեն կայացած իրողություն է։

Իվան Վոլինկինի ուշադրությունից չի վրիպել այն փաստը, որ առաջին նախագահն իր ելույթի զգալի մասը կառուցել էր Հայաստանի ԵՏՄ-ին անդամակցելու փաստի վրա։ Այդուհանդերձ, Ռուսաստանի դեսպանը զերծ մնաց գնահատականներ հնչեցնելուց:

«Ազատության» հարցին, թե ինչպե՞ս է Ռուսաստանը պատկերացնում Հայաստան-Եվրամիություն հետագա հարաբերությունները, Վոլինկինն ասաց, որ Հայաստանը ԵՏՄ-ին միանալով ճիշտ ռազմավարական որոշում է կայացրել։

«Ռուսաստանն իր հարաբերություններն ունի ԵՄ-ի հետ, և լիովին նորմալ է, երբ պետությունները փորձում են բազմակողմանի հարաբերություններ զարգացնել: Կարևորն այն է, որ դրանք չլինեն ի վնաս Եվրասիական տնտեսական միությանը։ Բայց, ես կարծում եմ, որ Հայաստանը, ԵՏՄ-ին միանալով, ճիշտ ռազմավարական որոշում է կայացրել, սակայն դա դեռ չի նշանակում, որ Հայաստանի համար փակ են այլ երկրների հետ համագործակցելու հնարավորությունները», ֊ նշեց դեսպանը։