Epress.am Լուրեր Հայաստանից
Այսօր Հայաստանի եզդիական համայնքի ներկայացուցիչները ակցիա են անցկացրել Ազգային Ժողովի շենքի դիմաց և նամակներ ուղարկել ԱԺ բոլոր խմբակցություններին՝ հորդորելով ՀՀ օրենսդիրին ճանաչել Իրաքում եզդիների ցեղասպանությունը: Ակցիայի մասնակիցներն ԱԺ պատգամավորների ընտրությանն են թողնում՝ ինչպես դա անել՝ հայտարարության, թե օրենքի տեսքով: Օրը պատահական չէր ընտրված. 1948 թվականի դեկտեմբերի 9-ին ՄԱԿ-ը ցեղասպանությունների դատապարտման և կանխարգելման մասին կոնվենցիա է ընդունել:
Ինչպես Epress.am-ին հայտնել է ակցիայի նախաձեռնողներից մեկը՝ «Սինջար» եզդիների ազգային միավորման նախագահ Բորիս Մուրազին, իրենք դիմել են Արտաքին գործերի նախարարությանը երկու հարցումով։ Դրանցից մեկով «Սինջարի» ներկայացուցիչները ցանկանում են առարկայական հաշվետվություն ստանալ, թե ինչպես է ծախսվել Հայաստանից Իրաքի եզդիներին ուղղված 100 հազար դոլար դրամական օգնությունը:
«Բացի նրանից, որ մեզ համար կարևոր է, որ մեր քույրերին և եղբայրներին օգնենք, պետք է պետական միջոցները նպատակային ծախսվեն»,- ասել է Բորիս Մուրազին:
Երկրորդ հարցումը վերաբերում էր Իրաքի փախստականների խնդրին: Մուրազին վստահ է, որ Հայաստանը չի ընդունի եզդի փախստականներին:
«Ամիսներ առաջ ասացին, որ աշխատանքներ պետք է տանեն, այս հարցը պետք է քննարկվի պետական կառույցների հետ, համակարգված քայլեր մշակվեն։ Թող հիմա ցույց տան, ֆիքսենք՝ ԱԳՆ-ն ի՞նչ քայլեր է իրականացրել այդ ուղղությամբ», – նախարարության պատասխանին է սպասում է եզդիական համայնքը:
Ակցիայի մասնակիցները կարևորել են Հայաստանի կողմից պետական մակարդակով եզդիների ցեղասպանության հնարավոր ընդունումը՝ նշելով, որ դա նաև այլ երկների համար կարող է օրինակ դառնալ:
«Դա կբերի նրան, որ օգնությունը փախստականներին, ինչպես նաև իրենց տարածքները հետ բերելու համար կռվող եզդի մարտիկներին, ավելի ինտենսիվ կլինի: Նրանք կվերադառնան իրենց տները»,- Epress.am-ի հետ զրույցում ասել է «Սինջարի» փոխնախագահ Մամե Ամիրյանը:
Նրա խոսքով՝ Իրաքում իսլամիստների հարձակումների հետևանքով այժմ կա 700-800 հազար եզդի փախստական, իսկ բոլոր փախստականների թիվը, ներառյալ քրիստոնյաներն և շիա մահմեդականները, հասնում է մոտ 2 միլիոնի:
Եզդիները, ովքեր դեռևս Իրաքում են, ապրում են վրաններում, նրանց այլ երկիր տեղափոխվելը բարդ է նաև այն պատճառով, որ նրանց մեծ մասը չունի անձնագիր: Մոտ 30 հազար եզդի ապաստան է ստացել Թուրքիայում: