Epress.am Լուրեր Հայաստանից
Հայաստանի արտագործնախարար Էդվարդ Նալբանդյանը, ըստ էության, չի պատասխանել այն հարցին՝ արդյոք Գյումրիի սպանության գործում խախտվել է հայ֊ռուսական համաձայնագրի այն կետը, համաձայն որի ռուսական ռազմաբազայի տարածքից դուրս կատարված իրավախախտման մեջ կասկածվող անձը պետք է հանձնվի ՀՀ իրավասու մարմիններին։ Նշենք, որ անցյալ շաբաթ Ազգային ժողովում Գյումրիի սպանության քննարկման ժամանակ ԱԺ «Ժառանգություն» խմբակցության պատգամավոր, ՀՀ նախկին արտգործնախարար Ալեքսանդր Արզումանյանը հայտարարել էր, որ այդ հարցին պետք է պատասխանի ոչ թե ՀՀ գլխավոր դատախազ Գևորգ Կոստանյանը, այլ ՀՀ արտգործնախարարը, քանի որ խնդիրը միջազգային պայմանգրին է վերաբերում։ ԱԺ մի քանի պատգամավորներ պահանջել էին Նալբանդյանի ներկայությունը խորհրդարանական լսումների ժամանակ։
Այսօր մամուլի ասուլիսի ընթացքում պատասխանելով Epress.am-ի լրագրողի հարցին՝ Նալբանդյանն ընդամենը նշել է, որ եթե ցանկացած պայմանագրի դեպքում հակասություններ են առաջանում՝ «այդ ժամանակ իրավասու կառույցները պետք է դիմեն՝ ստեղծելու հանձնաժողով»։ Նա հայտարարել է, որ եթե հանձնաժողովը որոշի, թե խախտումներ կան, այդ ժամանակ միայն խնդիրը կարող է լուծվել դիվանագիտական ճանապարհով։ Ով և ում պետք է դիմի հանձնաժողով ստեղծելու համար, նախարարը չի մանրամասնել։
Նալբանդյանը հավելել է միայն, որ եթե Ազգային ժողովից ԱԳՆ֊ին հրավիրեն լսումներին, ապա ինքը կամ արտգործնախարարության մեկ այլ ներկայացուցիչ Աժ֊ում կհանդիպի պատգամավորների հետ։