Epress.am Լուրեր Հայաստանից
Արտաշատի կենտրոնում նախկին հյուրանոցի շենքում բնակվող անապահով քաղաքացիները քաղաքապետարանից հրահանգ են ստացել հնարավորինս շուտ լքել իրենց կացարանները: Պաշտոնական հիմնավորման համաձայն` շենքը պետք է վերանորոգվի, և մարդիկ, ովքեր այժմ բնակվում են կիսավեր հյուրանոցում, պետք է տարահանվեն մինչև ապրիլի 15-ը:
Մի քանի ընտանիքի քաղաքապետարանն առաջարկել է տեղափոխվել Արտաշատ քաղաքի Թումանյան փողոցի վրա գտնվող հին մանկապարտեզի շենք: 1991 թվականից շենքում ապրող, Բաքվից եկած փախստական Լաուրա Պողոսյանը Epress.am-ին պատմել է, որ մանկապարտեզում դահլիճի հատակին կավիճով բաժանարար գծեր են արել: Այսինքն՝ նույնիսկ պատեր չկան, և բնակիչները դրանք ինքնուրույն պետք է կառուցեն:
«Իմ որդին զորակոչվելու է բանակ մայիսին, 17 տարեկան է, այսինքն՝ մի ամիս էլ փողոցում պետք է ապրի: Եթե մեզ քցեն դուրս, չեմ տալու՝ որդուս տանեն բանակ: Աղջկաս էլ այստեղ չեմ կարողացել պահել, տվել եմ բարեկամիս հետ է ապրում՝ Արարատում»,- ասել է Լաուրա Պողոսյանը:
Հյուրանոցի շենքը փողոցից քիչ է տարբերվում. որոշ աստիճանավանդակներ այլևս անանցանելի են, ջուր չկա, կոյուղին չի գործում, բնակիչները լողանում են իրենց ընկերների և բարեկամների տներում: Որոշ սենյակներում էլեկտրաէներգիա ևս չկա: Լույս ու ջեռուցում չունի, օրինակ, ազատամարտիկ Վարդան Թովմասյանի սենյակը: Շենքի մեկ այլ բնակիչ Գագիկ Գևորգյանը հաշմանդամ է դարձել՝ ցրտի պատճառով նա զրկվել է ձեռքերի 8 մատներից: Գևորգյանը ևս ասել է, որ չի կարող մանկապարտեզում տուն կառուցել: Հյուրանոցում բնակվողները սենյակները ջեռուցում են վառելու ենթակա աղբով:
«2004 թվականին շենքը սեփականաշնորհեցին, մինչև օրս չգիտենք սեփականատիրոջը, միայն պարոն Մուրադյանին գիտենք, նա հյուրանոցի տնօրենն է: Նա է վարձերը հավաքում», – ասել է Գևորգյանը:
Նրա խոսքով՝ այդ պայմաններում ապրելու համար իրենք վճարում են 4-ից 10 հազար դրամ՝ կախված տարածքից: Epress.am-ի հետ զրույցում հյուրանոցի տնօրեն Արմեն Մուրադյանը հերքել է, թե անապահով ընտանիքներից գումար են վերցնում: Ինչ վերաբերում է տեղահանմանը՝ Մուրադյանն ասել է, որ բնակիչներին թույլ կտան մնալ մինչև հյուրանոցում շինարարական աշխատանքների սկսվելը, իսկ երբ դա կլինի, դեռևս որոշված չէ:
«Մարզպետարանում ընդամենը ասել են, որ եթե դուք չեք ուզում մանկապարտեզում տարածք ստանալ, ասեք՝ մենք տեղերը այլ անապահով ընտանիքների կտանք», – պարզաբանել է Մուրադյանը: