Home / Հայաստան / Ակտիվիստը պատմել է՝ իրեն բերման էին ենթարկել գողացված պլանշետի պատճառով

Ակտիվիստը պատմել է՝ իրեն բերման էին ենթարկել գողացված պլանշետի պատճառով

Քաղաքացիական ակտիվիստ Արսեն Օհանյանը, ով այսօր առավոտյան հրավիրվել էր ոստիկանության բաժին Ռուսաստանում գողություն կատարելու կասկածանքով, հարուցված քրեական գործի մասին մանրամասներ է ներկայացրել իր ֆեսյբուքյան էջում: Օհանյանը գրել է, որ քննչական բաժնի աշխատակիցներն այսօր առավոտյան իրեն հրավիրել են բաժին իբր ծեծկռտուքի գործով, սակայն հետագայում բաժնում ասել են, որ գործը վերաբերում է Ռուսաստանում կատարված գողությանը: 

«Ասեցին, որ տանը ճիշտը չեն ուզեցել ասեն, որ ընտանիքիս անդամներին շատ չանհանգստացնեն: Նախ հանգամանքները ներկայացրին, որ ես նոյեմբերից հետախուզման մեջ եմ, բայց ստեղ նոր ա դա հասել: Ինձնից մատնահետքեր վերցրին, հետո արդեն երկրից չհեռանալու մասին ստորագրությամբ բաց թողեցին՝ էդ գործի նյութերը գալու դեպքում արդեն հետագայում մնացած գործընթացները ստեղ կատարելու համար:

Ասեմ, որ ստեղի ոստիկանները՝ ավելի կոնկրետ հետախուզման բաժնի աշխատակիցները, ոչ մի թշնամանք կամ բացասական տրամադրվածություն իմ նկատմամբ չեն ցուցաբերել, իրանց գործը նորմալ կատարեցին: Ինչ վերաբերում ա նրան, թե արդյոք ստեղ կար քաղաքական ենթատեքստ. էս պահի դրությամբ կարամ ասեմ, որ ոչ, չկա, ու ամեն ինչ դեռ օրենքի շրջանակներում ա: Բայց թե ինչպես հետագայում իրանց կդրսևորեն համապատասխան մարմինները՝ դատախազություն, քննչական ծառայություն և այլն, դրանից արդեն պարզ կլինի էս ամենի քաղաքական ենթատեքստ ունենալը: Հնարավոր ա՝ էս ամենը օգտագործվի իմ դեմ հետագայում, բայց դեռ վաղ ա ինչ-որ բան ասել»,- գրել է Օհանյանը:

Ինչ վերաբերում է գողության դեպքին, Օհանյանի կարծիքով, իր դեմ մեղադրանքը թյուրիմացության արդյունք է։ Նա ասում է, որ գնել է չինական պլանշետ, որը, ինչպես հետագայում պարզվել է, գողացված էր:

«Ուրեմն Ռուսաստան լինելու ժամանակ ձեռի վրայից գնել եմ չինական պլանշետ, տվել եմ մոտավոր 2500 ռուբլի: Հետո հենց նույն օրը էդ պլանշետով մտել եմ «Մագնիտ» սուպերմարկետ, որտեղ տեսա վաճառքում դրած էդ նոր առած պլանշետից: Դե հետաքրքրության համար վերցրել եմ, ուսումնասիրել, ձեռս բռնած ման եմ էկել խանութում, հետո դրել եմ տեղը: Հետո, իմ առևտուրը անելուց հետո, դուրս գալուց խանութի պահնորդները ինձ խնդրեցին գնալ իրանց սենյակ, իբրև թե ինչ-որ խնդիր կա՝ կապված կասսայի ու իմ գնած ապրանքների հետ: Իրանց սենյակում խնդրեցին մոտիս իրերը հանեմ դնեմ սեղանին: Հանելուց հետո հարցրին, թե որտեղից էս պլանշետը, ասեցի, որ դրսում եմ գնել: Սրանք ասեցին, որ իրանց մոտից էդ պլանշետից են գողացել ու հիմա մտածում են, որ գողը ես եմ»,- գրել է Օհանյանը:

Նրա խոսքով՝ իրեն չեն հավատացել ոչ խանութի աշխատակիցները, ոչ ոստիկանները:

«Հետո արդեն տարան КПЗ (Ձերբակալվածների պահման վայր), 3 օր պահեցին էնտեղ, որ նյութեր նախապատրաստեն իմ դեմ, որից հետո ինձ պետք ա տանեին քննիչի մոտ ցուցմունք տալու: Բայց ստացվեց նենց, որ 3 օրից ինձ բաց թողեցին, չգիտեմ խի, ասեցին՝ ազատ ես, գնա: Դրանից հետո ես հենց հաջորդ օրը վերադարձել եմ Հայաստան,հ ետագա գլախացավանքից խուսափելու համար»,- գրել է Օհանյանը:

Լուսանկարը՝ Արսեն Օհանյանի ֆեյսբուքյան էջից