Epress.am Լուրեր Հայաստանից
Իշխանությունների նախաձեռնած սահմանադրական բարեփոխումների մասին քննարկումներին պետք չէ մասնակցել, որովհետև, դա անելով, ներքաշվում ես անիմաստ մի գործընթացի մեջ: Այս մասին այսօր «Մեդիա կենտրոնում» կայացած քննարկման ժամանակ հայտարարել է «Համագործակցություն հանուն ժողովրդավարության» ՀԿ-ի նախագահ Ստեփան Դանիելյանը:
Նրա խոսքով՝ քննարկումներն անիմաստ են երկու պատճառով. նախ՝ միևնույն է, քվեարկությանն ի վերջո դրվելիք տեքստում քաղաքացիական հասարակության կարծիքը չի արտահայտվելու, քանի որ կան մի խումբ մարդիկ, ովքեր ինքնուրույն որոշումներ են կայացնում:
«Երկրորդ՝ մենք գիտենք, թե հանրաքվեներն ու ընտրությունները Հայաստանում ինչ եղանակով են անցնում, այսինքն՝ մենք ո՛չ բովանդակության վրա, ո՛չ ընդունել-չընդունելու վրա որևէ լծակ չունենք: Իսկ ներքաշվելով՝ մենք միայն լեգիտիմացնում ենք այն, ինչ ուզում է անել իշխանությունը»,- ասել է Ստեփան Դանիելյանը:
Նա ասել է, որ ամբողջ հարցը Սերժ Սարգսյանի իշխանությունը պահպանելն է․ «Սերժ Սարգսյանը լուրջ խնդրի առաջ է կանգնել և ինքն էլ դեռ չգիտի՝ ինչ ճանապարհով է գնալու: Եթե, այնուամենայնիվ, խորհրդարանական կառավարման համակարգի անցնենք, անձի իշխանությունը խնդիրներ կունենա, քանի որ, թեկուզ սիմվոլիկ, նախագահին գոնե դատական համակարգը և որոշ կարևոր ֆունկցիաներ կտրվեն: Ես կարծում եմ՝ Սերժ Սարգսյանը կաշխատի խույս տալ խորհրդարանական համակարգից և ինչ-որ հիբրիդային տարբերակ կմտածի»:
«Իրավունքի և ազատության կենտրոնի» ղեկավար Վարդան Հարությունյանը, ով ևս մասնակցում էր քննարկմանը, ասել է, որ ինքը համոզված չէ, որ սահամանդրությունը փոփոխվում է վերարտադրության համար:
«Սահամնադրությունը չի մեղավոր Հայաստանի ունեցած խնդիրներում: Տվեք Հայաստանի, Ուզբեկստանի, Իրանի, Հյուսիսային Կորեայի, Ադրբեջանի իշխանություններին աշխարհի ամենակատարյալ սահմանադրությունը, նրանք միևնույն է կունենան այն երկիրը, որն ունեն: Սահմանադրությունը չէ, այլ քաղաքական վերնախավի աշխարհայացքն ու դաստիարակությունն են մեղավոր»,- ասել է Հարությունյանը: