Գլխավոր / Տեսանյութեր / Թեղուտի հանքավայրի թափոնաջրերը լցվում են գետը․ ՀԲՃ (ՏԵՍԱՆՅՈՒԹ)

Թեղուտի հանքավայրի թափոնաջրերը լցվում են գետը․ ՀԲՃ (ՏԵՍԱՆՅՈՒԹ)

Թեղուտի հանքավայրի թափոնաջրերը լցվում են Շնող գետը՝ դառնալով աղտոտման լուրջ աղբյուր։ Այս մասին տարածած հաղորագրության մեջ նշում է «Համահայկական բնապահպանական ճակատ» (ՀԲՃ) նախաձեռնությունը։

ՀԲՃ֊ն հաղորդագրության հետ տեսանյութ է տարածել, որում երևում է, որ պոչանքները լցվում են վտակը, որը թափվում է Շնող՝ ջրում եղած քարերի վրա նստվածք առաջացնելով։

«Տեսանյութում ներկայացվող ահազանգն ուղղում ենք համապատասխան պետական մարմիններին՝ մասնավորապես ՀՀ բնապահպանության նախարարությանը, որը պարտավոր է վերահսկել այս ամենը։ Մարդիկ առնվազն պետք է իմանան հետևյալ հարցերի հստակ և հավաստի պատասխանները․

1․ Ինչո՞ւ չի գործում ջրի շրջանառու համակարգը Թեղուտի հարստացուցիչ ֆաբրիկայում, և անհայտ բաղադրության հեղուկը հոսելով բնության մեջ խառնվում է Շնող գետին։

2․ Ի՞նչ բաղադրություն ունի այդ հեղուկը և դրա հետևանքով առաջացած նստվածքները, որոնցով պատված են ապարներն ու գետակի հունը։

3․ Հանքավայրի շահագործման սկզբից առ այսօր ուսումնասիրվել է արդյո՞ք այս հոսքաջրերի ֆիզիկո-քիմիական կազմը։ Եթե ուսումնասիրվել են, ապա ի՞նչ պարբերականությամբ, ո՞վ է իրականացրել դրանք և անպայման հանրայնացնել այդ լաբորատոր հետազոտությունների արդյունքները։

Բնապահպանության նախարարությանն առաջարկում ենք նաև կազմակերպել տեսչական ստուգումներ և պարզել «Թեղուտ» փակ բաժնետիրական ընկերության ողջ գործունեության համապատասխանությունը հանքավայրի շահագործման նախագծին ու ՀՀ օրենսդրությանը», ֊ նշում է ՀԲՃ֊ն։