Քննիչները սպառնացել են քաղաքացուն՝ պահանջելով հետ վերցնել ՊՆ աշխատակցի դեմ դիմումը․ ՀՔԱՎ

Քննիչները Երևանի բնակիչ Գ. Միքայելյանին նախ համոզել են հետ վերցնել իր դիմումը, իսկ երբ վերջինս հրաժարվել է՝ փորձել են ստիպել «գրել իրենց ուզածով»: Միքայելյանը բողոքում է ՀՀ Պաշտպանության նախարարության աշխատկցուհի Ի․ Սարգսյանի դեմ։

Միքայելյանը Հելսինկյան Քաղաքացիական Ասամբլեայի Վանաձորի գրասենյակին պատմել է, որ իր կնոջ՝ Ռ. Ավագյանի համար դեղամիջոց պատրաստելու նպատակով պայմանավորվածություն է ձեռք բերել Պաշտպանության նախարարության N զորամասի աշխատակցուհի Ի. Սարգսյանի հետ՝ 4000 ԱՄՆ դոլարի դիմաց 1 տոննա թորած նավթ ձեռք բերելու վերաբերյալ: Սարգսյանը, սակայն, չի փոխանցել նավթը: Այդ առիթով 2014 թ. նոյեմբերին Միքայելյանը դիմել է Քննչական կոմիտե, և նրա դիմումի հիման վրա հարուցվել է քրեական գործ:

Միքայելյանի պնդմամբ՝ քննչական բաժնում քննիչ Գ. Աստրյանը ահաբեկել է իրեն՝ զգուշացնելով, որ հանցագործության մասին հաղորդում ներկայացրած անձանց համար ևս հնարավոր բացասական հետևանքներ կարող են լինել:

Քննիչի անօրինական գործողությունների պատճառով՝ Միքայելյանի կինը բացարկ է ներկայացրել նրան, և գործը փոխանցվել է մեկ այլ քննիչի՝ Բ. Հարությունյանին: Վերջինս սակայն նախ հրաժարվել է քննել գործը, ապա, համաձայն Միքայելյանի, իր պետի հետ փորձել է սպառնալիքների միջոցով ստիպել «գրել իրենց ուզածով»:

«Միքայելյանը այդ ապօրինի գործողությունների առիթով դիմում է ներկայացրել Գլխավոր դատախազություն և Քննչական կոմիտե: Արդյունքում գործի վարույթը նախ փոխանցվել է քննիչ Թաթոյանին, ապա մեկ այլ քննիչի՝ Ս. Սարգսյանին: Վերջինս բազմիցս փորձել է սպառնալիքների միջոցով ստիպել, որ Միքայելյանը վերցնի Պաշտպանության նախարարության աշխատակցուհու կողմից փոխանցված 2000 ԱՄՆ դոլարը, որովհետև «միևնույնն է՝ գործը կարճելու է»:

Միքայելյանը հրաժարվել է ընդունել քննիչի առաջարկը, ինչից հետո 2016 թ. մարտի 5-ին ստացել է քրեական գործը կարճելու մասին որոշում», ֊ նշում է ՀՔԱ Վանաձորի գրասենյակը:

Քաղաքացու խախտված իրավունքները վերականգնելու և քրեական գործ հարուցելու հարցով Հելսինկյան Քաղաքացիական Ասամբլեայի Վանաձորի գրասենյակը դիմել է ՀՀ գլխավոր դատախազ Գևորգ Կոստանյանին: