Home / Տեսանյութեր / Դատարանը հաշվի չի առել Հյուսիսային պողոտայի իր բնակարանի համար պայքարողի ներկայացրած փաստերը

Դատարանը հաշվի չի առել Հյուսիսային պողոտայի իր բնակարանի համար պայքարողի ներկայացրած փաստերը

Հյուսիսային պողոտայի հարևանությամբ գտնվող Տերյան 23 շենքի բնակիչ Վարդան Գերավետյանը դիմել է Վճռաբեկ դատարան՝ բողոքարկելով Վերաքննիչ դատարանի մայիսի 12-ի որոշումը։ Դրա համաձայն, Գերավետյանը պարտավոր է երկու ամսվա ընթացքում լքել իր բնակարանը։ Վճռաբեկի իր բողոքում բնակիչը պնդում է՝ Վերաքննիչի վճիռը կայացվել է դատավարական իրավունքի նորմերի կոպիտ խախտումով, և ինքը չի պատրաստվում լքել իր բնակարանը։

Իր բողոքում Գերավետյանը նշել է մի շարք հանգամանքներ, որոնք Վերաքննիչ դատարանը հաշվի չի առել որոշումն ընդունելիս։

Բնակիչն ընդգծում է՝ Կառավարությունը 2013 թվականին որոշում է կայացրել, համաձայն որի՝ հասարակության և պետության կարիքների համար Գերավետյանը պարտավոր է լքել իր բնակարանը և այն հանձնել «Լոկալ Դիվելոփըրզ» ՍՊԸ-ին։ Ինքը, սակայն, այդ որոշումը ստացել է 1 ու կես ամիս ուշ, ինչն արդեն իսկ օրենքի լուրջ խախտում է։ Վերջին փաստի վրա, պնդում է Գերավետյանը, ուշադրություն չեն դարձրել սկսած Կենտրոն և Նորք-Մարաշ վարչական շրջանների դատարանից։ Դրան հակառակ, հայցվոր կողմը՝ «Լոկալ Դիվելոփըրզ» ՍՊԸ-ն, պնդում է, որ հասցեատերը միտումնավոր հրաժարվել է այն ստանալուց։ Գերավետյանը համաձայն չէ այդ վարկածի հետ․ նա ընդգծում է, որ նման դեպքերում ծանուցումը կվերադարձվեր ընկերությանը «մերժված» նշագրումով, ինչը տեղի չի ունեցել։

Արդեն իսկ Վերաքննիչ դատարանում Գերավետյանը ներկայացրել է երևան եկած մի նոր հանգամանք, որի վրա դարձյալ դատարանը ուշադրություն չի դարձրել։ Բնակարանի փոխարեն փոխհատուցման գումարի չափը սահմանող անշարժ գույքի գործակալության «Անիկոմ» ՍՊԸ-ի մասնագետ Պյոտր Գրիգորյանցը մասնագիտական որակավորման ստուգումը չի անցել, 01.01.2014 թ. մինչև 31.12.2014թ. ընկած ժամանակահատվածում (Գերավետյանի բնակարանի գնահատման ժամանակ-խմբ․) չի ունեցել անշարժ գույքի գնահատողի որակավորման վկայական, հետևաբար նրա կողմից կատարված գնահատումը չի կարող դրվել վճռի հիմքում:

Բացի դրանից, դեռևս առաջին ատյանի դատարանը մերժել էր գործում փաստաբան ներգրավելու Գերավետյանի կողմից ներկայացված միջնորդությունն այն պատճառաբանությամբ, որ վերջինս ցանկություն է հայտնել փաստաբան ներգրավել միայն այն բանից հետո, երբ դատարանն արդեն իսկ ավարտել է ապացույցների հետազոտումը:

Գերավետյանի խոսքով՝ փաստաբան ներգրավելու անհրաժեշտությունը ծագել էր այն բանից հետո, երբ իր կողմից բերված ապացույցները և վկայակոչված հանգամանքները հաշվի չեն առնվել դատարանի կողմից։ Մերժելով այդ միջնորդությունը, պնդում է Գերավետյանը, դատարանը խախտել է «Մարդու իրավունքների և հիմնարար ազատությունների պաշտպանության մասին Եվրոպական Կոնվենցիան»։

Հիշեցնենք, որ Կառավարության որոշմամբ՝ Տերյան 23, 25 և Լալայանց 37 հասցեներում գտնվող շենքերը ճանաչվել էին բացառիկ հանրային գերակա շահ և որոշում էր ընդունվել դրանք քանդել, տարածքը հանձնելով Սամվել Մայրապետյանին պատկանող «Լոքալ դեվելոփերզ» ընկերությանը, որն էլ պետք է փոխհատուցում տա բնակիչներին։ Վերջիններս հրաժարվում են լքել իրենց տները՝ դժգոհելով փոխհատուցման չափից, իսկ գումարի այլընտրանքը՝ տրամադրվող բնակարանները, բնակիչների պնդմամբ՝ վատ որակի են: