Home / Հայաստան / Ոստիկանները ծնողներին բերել էին ՊՊԾ գնդի տարածք. որդին հրաժարվեց տուն գնալ

Ոստիկանները ծնողներին բերել էին ՊՊԾ գնդի տարածք. որդին հրաժարվեց տուն գնալ

«Սասնա ծռեր» խմբի անդամ էդգար Սողոմոնյանի հայրն ու մայրը երեկ գրավված ՊՊԾ գնդի տարածք էին եկել և համոզում էին իրենց որդուն, որպեսզի իրենց հետ տուն գնա: Ծնողներին այնտեղ էին բերել ոստիկանության աշխատակիցներն այն ժամանակ, երբ «Սասնա ծռերի» անդամներին այցելել էին լրագրողները:

Սողոմոնյանի ծնողները վստահեցնում էին, որ իրենց որդին ՊՊԾ գնդի տարածքում անելիք չունի և պետք է իրենց հետ տուն գնա: «Հանձնում ես ու գնում, Էդգար, դու հիմա էդ զենքը դնում ես ու գալիս ես, ես առողջություն չունեմ, քեզ քաշ տալով կտանեմ: Եթե ուզում ես չմեռնեմ, ուրեմն գալիս ես իմ հետ հիմա», – պնդում էր Էդգարի հայրը՝ Մերուժան Սողոմոնյանը, ով հաշմանդամություն ունի և դեպքի վայր էր եկել սայլակով::  

Սակայն Էդգար Սողոմոնյանը հրաժարվել է ծնողների հետ հեռանալ: Նա նշել է, որ ինքը ոչ մի տեղ չի գնալու և մնալու է մինչև վերջ: Լրագրողների հետ զրույցում Սողոմոնյանն ասել է, որ իրեն ոչ-ոք չի ստիպել գնալ նման քայլի և ինքը հանցագործ չի, այլ պարզապես եկել է պայքարելու հայրենիքի համար: Խմբի անդամ Սեդրակ Նազարյանը համոզված է, որ իշխանությունը միտումնավոր է ծնողներին բերում այստեղ, որպեսզի հոգեբանական ճնշում գործադրի տղաների վրա:   

«Սասնա ծռեր» խմբի անդամ Պավել Մանուկյանը Սողոմոնյանին առաջարկել է վերջին անգամ ընտրել՝ կամ գնալ ծնողների հետ, կամ մնալ ՊՊԾ շենքում մինչև վերջ: Էդգար Սողոմոնյանը որոշել է չլքել ապստամբներին, ովքեր հուլիսի 17-ից գտնվում են գրաված տարածքում:

Նշենք, որ հուլիսի 20-ին ոստիկանության հրավիրած ասուլիսի ժամանակ Սողոմոնյանի ծնողները հավաստիացրել են, որ իրենց որդուն իր կամքին հակառակ են տարել և խնդրում էին Պավել Մանուկյանին վերադարձնել նրան: