Անապահովների բուժման համար ներկա ու նախկին նախարարների հիվանդանոցներին գումար կհատկացվի․ «ՀԺ»

Առողջապահության նախարարությունը վերջերս 134 միլիոն դրամի չափով լրացուցիչ համաձայնագրեր է կնքել 25 բժշկական կազմակերպությունների հետ՝ պետության կողմից երաշխավորված անվճար բժշկական օգնության և սպասարկման շրջանակներում բնակչության սոցիալապես անապահով և հատուկ խմբերում ընդգրկված քաղաքացիների դժվարամատչելի ախտորոշիչ հետազոտությունների իրականացման համար։ Այս մասին գրում է «Հայկական ժամանակ» օրաթերթը։

Թերթի հրապարակած տվյալներից պարզ է դառնում, որ գումարի հիմնական մասը ստացած բժշկական կազմակերպությունները պատկանում են պաշտոնատար անձանց։

«Համաձայն կնքված պայմանագրերի հավելվածների՝ այդ 134 միլիոն դրամը բաշխվելու է հետևյալ կերպ. ամենամեծ մասը` 24 միլիոնը, բաժին է հասնելու «Վարդանանց» բժշկական կենտրոնին, որը պատկանում է «ԱՐԻՆՏԵՐԼԵՎ» ՍՊԸ-ին, իսկ այս ընկերությունը հիմնադրել է ՀՀ առողջապահության նախարար Լևոն Ալթունյանը։

Մի փոքր ավելի պակաս` 23 միլիոն դրամ էլ հատկացվել է «Նաիրի» բժշկական կենտրոնին, որն էլ իր հերթին պատկանում է «Արմամաքս» ՍՊԸ-ին: Այս ընկերությունը կապվում է առողջապահության նախկին նախարար Հարություն Քուշկյանի անվան հետ:

«Խոշոր հատկացումների երրորդ պատվավոր տեղը զբաղեցնում է առողջապահության կրկին նախկին նախարար Արմեն Մուրադյանի և Ամենայն հայոց կաթողիկոս Գարեգին Բ-ի անվան հետ կապ ունեցող «Իզմիրլյան» բժշկական կենտրոնը։ «Իզմիրլյանը» ստացել է 10 միլիոն դրամ», – գրում է թերթը՝ հղում կատարելով կառավարության ինտերակտիվ բյուջեին, որտեղ տեղադրված են բոլոր պայմանագրերը։

Մանրամասները՝ թերթի այսօրվա համարում