Home / Ոստիկանություն / Վարդան Օսկանյանի որդուն ձերբակալել են

Վարդան Օսկանյանի որդուն ձերբակալել են

ՀՀ Արտաքին գործերի նախկին նախարար, ԱԺ պատգամավոր, «Համախմբում» կուսակցության նախագահ Վարդան Օսկանյանի որդին՝ 33-ամյա Արա Օսկանյանը ձերբակալված է։ Այս մասին հայտնում է ՀՀ Քննչական կոմիտեն։ Օսկանյանի հետ ձերբակալվել է նաև նրա ազգական Հ․ Սիրադարյանը։

Քննության վարկածի համաձայն, Օսկանյանը և նրա ազգական Հ․Սիրադարյանը կասկածվում են կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով մարդուն ազատությունից ապօրինի զրկելու մեջ։

«Քննությամբ ձեռք բերված նախնական տվյալներով փետրվարի 16-ին` ժամը 17:00-ի սահմաններում Երևան քաղաքի Լենինգրադյան փողոցի «Ռոբերտո» խանութ-սրահի հարակից հատվածից Ն.Բերբերյանին նստեցրել են ավտոմեքենայի մեջ, գնացել Աբովյան քաղաք և նրա կամքին հակառակ և իր առողջության համար վտանգավոր բռնություն գործադրելու սպառնալիքներ հնչեցնելով՝ ապօրինաբար զրկել ազատ տեղաշարժվելու իրավունքից և պահանջել վերադարձնել 1.500.000 դրամ պարտքը», ֊ նշված է Քննչական կոմիտեի հաղորդագրության մեջ:

Կասկածյալները հրաժարվել են ցուցմունք տալ։

Հիշեցնենք, որ Արա Օսկանյանը 2005թ․ վրաերթի էր ենթարկել մի քաղաքացու՝ վարելով հոր՝ այդ ժամանակ արտաքին գործերի նախարարի ծառայողական մեքենան։ Արա Օսկանյանը պատասխանատվության չէր ենթարկվել։