Home / Դատարան / Նաիրիտցիները պահանջում են պատասխանատվության ենթարկել իրենց գործը քննող դատավորին

Նաիրիտցիները պահանջում են պատասխանատվության ենթարկել իրենց գործը քննող դատավորին

«Նաիրիտ» գործարանի նախկին աշխատակիցներն այսօր դիմել են Արդարադատության խորհուրդ՝ պահանջելով պատասխանատվության ենթարկել իրենց բողոքի քննությունը 5 ամսով հետաձգած Շենգավիթ վարչական շրջանի ընդհանուր իրավասության դատարանի դատավոր Գևորգ Նարինյանին։

Epress.am֊ի հետ զրույցում նախկին նաիրիտցիների շահերը պաշտպանող Տիգրան Սարգսյանը նշել է, որ դատավորի նման որոշումը հանգեցնում է նրան, որ իր պաշտպանյալները չեն վստահում նրա անաչառությանը:

«Դատավորները պետք է ողջամիտ ժամկետներում քննեն գործը, որպեսզի մարդու իրավուքները պաշտպանված լինեն: Քանի որ դատավոր Նարինյանը դատական նիստը հետաձգեց 5 ամսով, ինչն աննախադեպ բան է դատական պրակտիկայում, մենք տեսնում ենք միտում և դատավորի վարքագծի կանոնի խախտում, ինչի համար էլ դիմում ենք ներկայացրել Արդարադատության խորհրդի էթիկայի և կարգապահական հարցերի հանձնաժողով և պահանջել ենք դատավորին ենթարկել կարգապահական տույժի»,- նշել է Սարգսյանը։

Փաստաբանի խոսքով՝ դատավորի նշանակած ժամկետը անտրամաբանական է, և եթե Արդարադատության խորհուրդը հաստատի, որ դատավորի վարքագիծը նորմալ է, կարելի է վստահորեն ասել, որ Հայաստանը չունի դատական համակարգ: