Գրաքննություն․ «Ոսկե Ծիրանը» չի ցուցադրի ԼԳԲՏ թեմայով երկու ֆիլմեր

ԼԳԲՏ թեմայով երկու ֆիլմերը պատճառ են դարձել, որպեսզի երևանյան «Ոսկե ծիրան» կինոփառատոնը չեղյալ համարի իր արտամրցութային ծրագիրը։

Հուլիսի 9-ին Երևանում մեկնարկող 14-րդ «Ոսկե Ծիրան» միջազգային կինոփառատոնի «Հայացք ներսից և դրսից» արտամրցութային ծրագրում ընդգրկվել էին ԼԳԲՏ թեմայով երկու ֆիլմ՝ «Լսիր ինձ․ չպատմված պատմություններ ատելությունից անդին» վավերագրությունը և «Ծիրանի այգիներ» գեղարվեստական ֆիլմը։

Ինչպես այսօր տարածած հայտարարության մեջ նշում է «Հանրային տեղեկատվություն և գիտելիքի կարիք» կազմակերպությունը, Կինեմատոգրաֆիստների միությունը, որի դահլիճում պետք է ցուցադրվեին ֆիլմերը, որոշել է գրաքննության դիմել՝ պահանջելով հանել այդ երկու ֆիլմերը արտամրցութային ծրագրից, իսկ հակառակ դեպքում՝ ամբողջությամբ հանել ծրագիրը։

«Կինեմատոգրաֆիստների միությունից մեզ հայտնեցին, որ իրենք սգի մեջ են (հունիսի 23-ին մահացել է կինեմատոգրաֆստների միության նախագահ Ռուբեն Գևորգյանցը) և իրենք ոչ մի ֆիլմ ցույց չեն տալու։ Արդյունքում՝ «Ոսկե Ծիրանը» որոշեց հեռացնել ամբողջ ծրագիրը, որտեղ առկա էին մոտ 40 ֆիլմ, որոնք ԼԳԲՏ հարցերից զատ անդրադառնում էին սոցիալական ոլորտին վերաբերող այլ խնդիրների, Ցեղասպանության հարցին, ինչպես նաև Ղարաբաղյան հակամարտությանը և այլն։

Այս իրավիճակի պատճառը փոքրաթիվ մարդիկ են, որոնք հիմա էլ դուրս են եկել հայկական կինոարտադրության դեմ։ Կինեմատոգրաֆիստների միության որոշումը փաստացի ցույց տվեց, որ իրենք ոչ թե ֆիլմարտադրության շահերն են պաշտպանում, այլ որոշ մարդկանց, որոնք կարծում են, թե ֆիլմը չի կարող անդրադառնալ այնպիսի խնդիրներին, ինչպիսիք են ԼԳԲՏ հարցերը։

Այդ մարդկանց մոտեցումը նման է խորհրդային մի ժամանակահատվածի գրաքննությանը, երբ ռեժիսորներին չէր թույլատրվում անդրադառնալ եկեղեցուն կամ Հայոց ցեղասպանության հարցին։

Հասկանալով, որ սա ոչ միայն խտրականություն է Հայաստանի ԼԳԲՏ համայնքի դեմ, ստեղծագործական և արտահայտման ազատությունների ոտնահարում, այլ հարված նաև հայկական կինոարտադրությանը, մենք կոչ ենք անում Հայաստանի կինոարտադրողներին իրենց դիրքորոշումն արտահայտել հարցի շուրջ։

Մշակույթի նախարարությանը, որը «Ոսկե Ծիրան» կինոփառատոնի պետական աջակիցներից է, կոչ ենք անում դատապարտել տեղի ունեցածը՝ բացառելու հետագա գրաքննությունները և միջոցներ ձեռնարկել ծրագիրը վերականգնելու համար։ Հարկ է, որպեսզի «Ոսկե Ծիրան»-ը նույնպես վերանայի Կինեմատոգրաֆիստների միության հետ իրենց համագործակցությունը։

Հորդորում ենք նաև այս տարվա «Ոսկե Ծիրանին» մասնակցող թե՛ տեղի և թե՛ արտասահմանյան հյուրերին արտահայտել իրենց դիրքորոշումը», ֊ նշված է կազմակերպության հայտարարության մեջ։