Գլխավոր / Հայաստան / Ստալինյան տեռորի մասին ցուցադրությունից դաշնակցական արվամոլների պաշտպան Սորոսի հոտ էր գալիս

Ստալինյան տեռորի մասին ցուցադրությունից դաշնակցական արվամոլների պաշտպան Սորոսի հոտ էր գալիս

Հովհաննես Թումանյանի տուն-թանգարանում օգոստոսի սկզբին բացված «բոլշևիկյան բռնատիրության զոհերին նվիրված «Խավարում» ցուցահանդեսը փակվել է Մշակույթի նախարարության հրահանգով։

Ցուցահանդեսի փակման մասին բարձրաձայնել է թանգարանի նախագահ Նարինե Թուխիկյանը՝ նշելով, որ ցուցահանդեսի փակվելու պատճառը ինչ֊որ զրպատրությունն է եղել. Իրեն մեղադրել են Սորոսի հիմնադրամից գումար ստանալու, «արվամոլների պրոպագանդիստ» և «դաշնակցական» լինելու մեջ։

«Հայելու առաջ» հաղորդման ժամանակ Թուխիկյանը կարծիք է հայտնել, որ զրպարտությունը եղել է «շրջանակներից, որտեղ բացառված չեն կոմունիստական կամ հին, կարծրատիպային սերնդի ներկայացուցիչներ»։ «Եվ որպեսզի գործը գլուխ գա, դիմել են երևի որոշակի կառույցների՝ շանտաժի միջոցով, ես ենթադրում եմ»։

Նա պատմել է նաև, որ իրեն օգոստոսի 26-ին զանգահարել է մի մարդ, ով իր հետ խոսել է «նույն բառապաշարով, ինչ Կոմունիստական կուսակցության ղեկավարը կխոսեր» և մեղադրել, որ ցուցահանդեսից «դաշնակցականի հոտ է գալիս»։ «Ասաց՝ ես քեզ լավ եմ ճանաչում, դու Սորոսի հիմնադրամից փող ես ստանում և ասաց՝ դու արվամոլների պրոպագանդիստն ես։ Հեռախոսով ինձ վրա գործ սարքեց էս մարդը», — ասել է Թուխիկյանը։

Ըստ նրա, Թումանյանի տուն֊թանգարանը չէր կարող չնշել ստալինյան ռեպրեսիաների գագաթնակետը խորհրդանշող 1937 թվականի 80֊ամյակը և Բոլշեվիկյան հեղափոխության 100֊ամյակը, քանի որ Թումանյանի երեք որդիները եղել են այդ ստալինյան բռնաճնշումների զոհեր, իսկ չորրորդ որդին՝ օսմանյան բռնապետության զոհ է դարձել։ Պատմելով ցուցահանդեսի բովանդակությունից՝ թանգարանի տնօրենն ասել է, որ ցուցադրությունում եղել է նաև լյուստրացիայի կոչ անող ցուցանմուշ, ինչպես նաև աշխատանք Անաստաս Միկոյանի մասին, որը «Ստալինին խնդրում էր ևս 700 հոգու գնդակահարել»։

Մշակույթի նախարարությունից «Խավարում» ցուցահանդեսը փակելու որոշումը նախ «Ազատության»֊ը տված հարցազրույցում մեկնաբանել է փոխնախարար Արև Սամուելյանը․ «Մենք պետք է պատմությանը պարզ երեսով նայենք՝ այն մի փոքր քաղաքականացված էր: Երևի պետք էր հասարակությանը մի փոքր նախապատրաստել: Որոշ շտկումներից հետո այն կվերաբացվի»։

Factor.am֊ի հետ զրույցում նախարար Արմեն Ամիրյանն էլ ասել է, որ ցուցադրությունը փակվել է, քանի որ Թումանյանի թանգարանը նախարարության հետ նախապես չէր համաձայնեցրել իր ցուցադրությունը։