Գլխավոր / Բնապահպանություն / Եղվարդում առանց բնապահպանական փորձաքննության նավթավերամշակման գործարան են կառուցում

Եղվարդում առանց բնապահպանական փորձաքննության նավթավերամշակման գործարան են կառուցում

Հայաստանում «Լուբրեքս» ապրանքանիշի պաշտոնական ներկայացուցիչ «Արմօյլ» նավթամթերքի ներմուծմամբ զբաղվող ընկերությունը Կոտայքի մարզի Եղվարդ քաղաքում առանց բնապահպանական փորձաքննության կառուցում է նավթավերամշակման գործարան: Այս մասին գրում է Ecolur.org֊ը։

«Էկոլուր» ՀԿ֊ն հիշեցնում է, որ նավթավերամշակման արտադրությունը պարտադիր ենթակա է բնապահպանական փորձաքննության և «Շրջակա միջավայրի վրա ազդեցության գնահատման և փորձաքննության մասին» ՀՀ օրենքով դիտարկվում է ամենաբարձր ռիսկայնություն ունեցող` «Ա» կատեգորիայով:

ՀՀ բնապահպանական և ընդերքի տեսչական մարմնի (ԲԸՏՄ) ղեկավարի մամուլի քարտուղար Վրույր Պեպանյանի փոխանցմամբ, ԲԸՏՄ-ի ղեկավարի կողմից այսօր հարուցվել է վարչական վարույթ` պարզելու համար «ԱրմՕյլ» ընկերության գործունեության օրինականությունը:

Գործարանի կառուցումը մեծ աղմուկ է առաջացրել Եղվարդ քաղաքում, բնակիչները իրավիճակը անվանում են «էկոլոգիական աղետ», իսկ կառուցվող գործարանը` «ատոմային ռումբ»:

Armtimes.com֊ը ավելի վաղ տեսանյութ է հրապարակել Եղվարդից, որտեղ գործարանի կառուցմանը դեմ են հատկապես Եղվարդի Նատի թաղամասի բնակիչները՝ մոտ 80 ընտանիք, որոնց տներից մոտ 50 մետր հեռավորության վրա է շինարարությունն ընթանում:

«Նախորդ տարվանից սկսել են: Ոչ բնակիչներին, ոչ ոքի տեղյակ չեն պահել՝ ինչ գործունեություն են ծավալելու։ Եթե նախատեսվում է յուղի արտադրություն, մենք բնակիչներով պետք է տեղյակ լինենք՝ յուղի արտադրությո՞ւն է, թե՝ ոչ: Կամ եթե յուղի արտադրություն լինի, բնակիչներ են ապրում, երեխաներ են ապրում, հրդեհավտանգ է»,- ասել է թաղամասի բնակիչներից Արթուր Թումասյանը։

Եղվարդցիները հավաստի տեղեկություններ չունեն, թե ում է պատկանում «ԱրմՕյլ» ընկերությունը։

«Մենք այդ տեղեկությունները չենք կարող համարել հավաստի․․․ Այն ժամանակ, երբ կառույցը կանգնել է և չեն շարունակել շինարարությունը, իմացանք, որ Գագիկ Ծառուկյանը 50 տոկոս ներդրում ունի այս բիզնեսի մեջ, այդ ժամանակ շարունակվեց շինարարությունը»,֊ ասել է Թումասյանը։