Գլխավոր / Բանտ / Սեֆիլյանի դեմ գրած մեղադրանքում չկան շինություններ, կապի միջոցներ զավթելու հոդվածի հատկանիշներ

Սեֆիլյանի դեմ գրած մեղադրանքում չկան շինություններ, կապի միջոցներ զավթելու հոդվածի հատկանիշներ

Ընդդիմադիր քաղաքական գործիչ, «Հիմնադիր խորհրդարան» շարժման առաջնորդ, ղարաբաղյան պատերազմի մասնակից Ժիրայր Սեֆիլյանին չեն պարզաբանել՝ ինչ արարքի մեջ է ինքը մեղադրվում, ուստի իր համար պարզ չէ՝ ինչից ինքը պետք է պաշտպանվի։ Այս մասին այսօր պաշտպանական ճառում ասել է Սեֆիլյանի պաշտպան Տիգրան Հայրապետյանը։

Պաշտպանը նկատի ունի Սեֆիլյանի դեմ առաջադրված Քրեական օրենսգրքի 219֊դ հոդվածը, այն է՝ Շենքեր, շինություններ, տրանսպորտի, հաղորդակցության կամ կապի միջոցներ զավթելու փորձ։ Ըստ մեղադրանքի՝ Սեֆիլյանը նպատակ է ունեցել զավթել հեռուստաաշտարակը և Նուբարաշենի զորամասերը։

«Ասում են՝ նա ցանկանում էր դեկտեմբերի մեկին գրավել հեռուստաաշտարակը, բայց չի նշվում` ինչու չի արել: Ենթադրենք, պետք է գրավեր Նուբարաշենի զորամասերը մայիսի 30-ին և մինչև մայիսի 29-ը նախապատրաստական միջոցներ է ձեռնարկել, մայիսի 29-ին փոխել է մտադրությունը։ Կամովի հրաժարված անձը ենթակա չէ քրեական պատասխանատվության»,֊ ասել է Հայրապետյանը։

Բացի դա, նշված հոդվածում ասվում է, որ այն կիրառելի է այն դեպքերում, երբ զավթումը պետք է ուղեկցվի «այդ միջոցները ոչնչացնելու կամ վնասելու սպառնալիքով», և գրավողը պետք է «պահանջներ» ներկայացներ պետությանը։

«Հոդվածը չի կարող առաջադրվել, եթե դրա հատկանիշներից ոչ մեկը չկա։ Մեղադրանքի համաձայն, Սեֆիլյանը պետք է օգտագործեր հեռտուստաաշտարակը ուղիթ եթերով քաղաքացիներին կոչեր անելու համար, հեռուսաաշտարակը ոչնչացնելու նպատակ չկա նյութերում։ Երկրորդ՝ չկա որևէ խոսք, թե Սեֆիլյանը պահանջներ է ներկայացրել»,֊ ասել է Հայրապետյանը։

Փաստաբանը նաև բողոքել է դատավարության ընթացքից։ Ըստ նրա՝ դատավոր Տաթևիկ Գրիգորյանը թույլ չի տվել քրեական հոդվածով մեղադրվող ամբաստանյալներին պաշտպանել իրենց։

«Քրեական գործերով պաշտպանական կողմը պետք է հնարավորություն ունենա իր առարկությունները և միջնորդությունները ներկայացնել։ Սակայն նախագահողն անհիմն հեռացնում էր նրանց, նիստերը հանգիստ շարունակում առանց 7 պաշտպանների և 6 ամբաստանյալների», ֊ ասել է Հայրապետյանը։

Հիշեցնենք, որ Ժիրայր Սեֆիլյանի համար մեղադրող դատախազը պահանջել է 11 տարվա ազատազրկում: