Գլխավոր / Վերլուծություն / Ապամոնտաժել մաֆիոզ ՀՀԿ-ն՝ նոր վարչապետին հանգիստ քննադատելու համար

Ապամոնտաժել մաֆիոզ ՀՀԿ-ն՝ նոր վարչապետին հանգիստ քննադատելու համար

Հայաստանի Հանրապետական կուսակցությունը ոչ թե դասական իմաստով քաղաքական ուժ է, այլ նախկին իշխանության ստեղծած կիսամաֆիոզ կառույցի քաղաքական թև։ Քաղաքագետ, պատմաբան Միքայել Զոլյանը Հայաստանում ստեղծված քաղաքական իրավիճակն աանդրադարձել է իր ֆեյսբուքյան գրառման մեջ։

«Մի երկու խոսք ՀՀԿ ակտիվացման մասին: Կարող են ասել` ինչ ա եղել որ, քաղաքական պայքար ա, տենց էլ պիտի լինի: Բայց, խնդիրն այն է, որ այսօր ՀՀԿ-ն` իր խորհրդարանական ֆրակցիայով հանդերձ ոչ թե դասական իմաստով քաղաքական ուժ է, այլ նախկին իշխանության ստեղծած կիսամաֆիոզ կառույցի քաղաքական թևն է», — գրում է Զոլյանը։

Այսինքն, ըստ նրա, ՀՀԿ-ն իր ներկա տեսքով ընդամենն ապահովում է այդ մաֆիոզ, ոչ ֆորմալ կառույցի շահերի պաշտպանությունը քաղաքական դաշտում, այդ պատճառով այնքան էլ էական չէ, ինչ գաղափարական դիրքերից է հանդես գալիս ՀՀԿ-ը` ազգային-պահպանողական թե, ասենք, լիբերալ-եվրոպամետ։

«Ակնհայտ է «խորքային պետության» պլանը` հնարավորինս հետաձգել ընտրությունները և սպասել Նիկոլի թիմի ձախողումներին և հետո ետ վերցնել իշխանությունը։ Խորքային պետությունն աշխատում է երկու ուղղությամբ: Հասկանալով, որ անձամբ Նիկոլին կպնելը հակառակ էֆեկտ է տալու, կենտրոնանում են թիմի առանձին անդամների վրա, հատկապես որ նրանցից ոմանք առանձին առիթներ տալիս են: Եվ դա շատ վատ է մեր քաղաքական դաշտի համար: Մյուս ուղղությունն էլ դրսում Հայաստանի նոր իշխանություններին վարկաբեկելն է: Ընդ որում այդ լոբբինգը տարվում է ինչպես Արևմուտքում, այնպես էլ Ռուսաստանում: Սա ևս շատ վտանգավոր է, քանի որ խարխլում է Հայաստանի արտաքին քաղաքական դիրքերը: Դրա համար անհրաժեշտ է հնարավորինս շուտ ապամոնտաժել այդ մաֆիոզ կառույցը, այդ «խորքային պետությունը», որ հա՛մ նոր իշխանությունը հանգիստ աշխատի, հա՛մ էլ իրական, քաղաքական ընդդիմության ձևավորման պայմաններ ստեղծվեն: Եվ, ամենակարևորը, որ հնարավոր լինի հանգիստ խղճով քննադատել Նիկոլենց սխալները, առանց մտածելու, որ դրանով օգնում ես Սերժի վերադարձին», — ասված է գրառման մեջ։