Գլխավոր / Բանտ / Սևանում ոստիկանների ներկայությամբ հրազենից մարդ են վիրավորել

Սևանում ոստիկանների ներկայությամբ հրազենից մարդ են վիրավորել

Գեղաքրունիքի փոխմարզպետ Անդրանիկ Հակոբյանի որդու սպանության գործով դատավարության ընթացքում դատարանի դիմաց այսօր կրակոցներ են հնչել։ Կա մեկ մեկ վիրավոր։

Փաստինֆոն հայտնում է, որ մինչ դատարանի շենք մտնելը բակում, որտեղ եղել է նաև Սևանի ոստիկանության աշխատակիցները, ինչպես նաև բաժնի պետը, և բազմաթիվ այլ անձինք, ամբաստանյալի ազգականները սեռական բնույթի հայհոյանքներ են հնչեցրել տուժողի իրավահաջորդի հասցեին, հրազենը պահել են նրանց ուղղությամբ:

Դրանից հետո զինվածը կրակել է տուժողի իրավահաջորդի՝ Ռաֆիկ Վանոյի Հակոբյանի վրա, որին տեղափոխել են Երևանի հիվանդանոցներից մեկը:

Սպանված Հայկ Հակոբյանի իրավահաջորդի ներկայացուցիչ փաստաբան Հովսեփ Սարգսյանը հաստատել է կրակոցների մասին տեղեկատվությունը։ Գործով անցնող մեղադրյալը Մեխակ Հարությունյանն է՝ Նորատուսի գյուղապետ Մուրադ Հարությունյանի եղբորորդին:

Ըստ մեղադրանքի, Մեխակ Հարությունյանը ապօրինի կերպով ձեռք է բերել, պահել և կրել է ռազմամթերք հանդիսացող 48 ատրճանակային փամփուշտներ և գործարանային արտադրության մարտական ակոսափող հրազեն հանդիսացող 9մմ տրամաչափի ԻԲ 6528 համարի Մակարով տեսակի ատրճանակ, որից արձակված 7 կրակոցներով 2017թ. հունվարի 7-ին՝ ժամը 12.20-ի սահմաններում սպանել է Հայկ Անդրանիկի Հակոբյանին:

Կայքը գրում է, որ այս գործով քրեական զարգացումներ են եղել նաեւ նախաքննության փուլում. սպանության փորձ է տեղի ունեցել «Արմավիր» ՔԿՀ-ում պահվող Մխիթար Հարությունյանի նկատմամբ։ Այդ դեպքի առթիվ հարուցվել է առանձին քրեական գործ։