Գլխավոր / Ոստիկանություն / Սարյանի նկարներ, փող, կոկային. ինչ էր թաքցնում Սերժ Սարգսյանի եղբորորդին

Սարյանի նկարներ, փող, կոկային. ինչ էր թաքցնում Սերժ Սարգսյանի եղբորորդին

ՀՀ երրորդ նախագահ Սերժ Սարգսյանի եղբոր՝ ԱԺ նախկին պատգամագվոր Ալեքսանդր Սարգսյանի որդին՝ Նարեկ Սարգսյանը խաբեությամբ Մարտիրոս Սարյանի 14 գծանկար է ձեռք բերել, հայտնում է Ազգային անվտանգության ծառայությունը: Բացի դա, հետախուզման մեջ գտնվող Սարգսյանի մտերիմները՝ Սերոբ Սահակյանը և Վլադիմիր Շահինյանցը փորձել են նրա բնակարանից երկու ճամպրուկներ դուրս բերել, սակայն բերման են ենթարկվել: ԱԱԾ-ն հայտնում է, որ ճամպրուկների մեջ գտել են առգրավվել են կոկաին և մեթամֆետամին տեսակի թմրամիջոցներ, թվով 4 ատրճանակ, որոնցից մեկը խլացուցիչով, փամփուշտներ, անհայտ ծագման հաբեր, ապակյա և պլաստմասսայե խողովակներ՝ սպիտակավուն և սև հետքերով, կաթոցներ, որոնք ամենայն հավանականությամբ ծառայել են թմրանյութ օգտագործելու նպատակով և այլ իրեր:

«Ազգային անվտանգության ծառայությունում հաղորդում է ստացվել այն մասին, որ դեռևս 2013 թվականին Նարեկ Սարգսյանը չարաշահելով նկարիչ Մարտիրոս Սարյանի ժառանգներից մեկի վստահությունը, նրանից վերցրել է նկարչի շուրջ 280 000 ԱՄՆ դոլար արժողությամբ թվով 14 գծանկարները` խոստանալով դրանց դիմաց վճարել 28 հազար ԱՄՆ դոլար, իսկ մնացած գումարով համատեղ հիմնադրել խաղատուն և հովանավորել դրա գործունեությունը: Նկարներին տիրանալուց հետո Սարգսյանը խոստումը չի կատարել և, անտեսելով տուժողի բազմաթիվ պահանջները, հրաժարվել է վերադարձնել նկարները:

Հարուցված քրեական գործի շրջանակներում հուլիսի 4-ին խուզարկություն է կատարվել Նարեկ Սարգսյանի հաշվառման վայրում, որտեղից հայտնաբերվել են Նարեկ Սարգսյանի կողմից հափշտակված նկարները, ինչպես նաև 115 000 ԱՄՆ դոլար, 27 000 եվրո, թանկարժեք ժամացույցներ, բազմաթիվ ոսկյա մետաղադրամներ և զարդեր, որոնց ձեռքբերման հանգամանքների օրինականությունը ստուգվելու է քրեական գործի վարույթի շրջանակներում:

Խուզարկության ընթացքում Նարեկ Սարգսյանի հայրը՝ Ալեքսանդր Սարգսյանը, հայտնել է, թե իբր նկարները գնվել են իր կողմից: Նա ՀՀ ԱԱԾ քննչական վարչությունում հարցաքննվել է գործարքի հանգամանքների շուրջ: Բացի այդ, առերես հարցաքննության է ենթարկվել հաղորդում տված անձի հետ, ով կրկին պնդել է, որ նկարները խաբեությամբ իրենից հափշտակել է Նարեկ Սարգսյանը», — նշված է հաղորդագրության մեջ:

Մանրամասները՝ տեսանյութում.