Epress.am Լուրեր Հայաստանից
Տարածաշրջանային այցի շրջանակներում երեկ երեկոյան Ստեփանակերտից Երևան ժամանած ԵԱՀԿ-ի Մինսկի խմբի համանախագահներ Բերնար Ֆասիեին, Ռոբերտ Բրադտկեին, Իգոր Պոպովին և ԵԱՀԿ-ի գործող նախագահի անձնական ներկայացուցիչ Անջեյ Կասպրչիկին այսօր ընդունել է Հայաստանի արտգործնախարար Էդվարդ Նալբանդյանը:
Ինչպես հաղորդում են ԱԳՆ-ից, համանախագահները Էդվարդ Նալբանդյանին են ներկայացրել նախորդ օրերին Բաքվում և Ստեփանակերտում Ադրբեջանի և Լեռնային Ղարաբաղի իշխանությունների հետ իրենց քննարկումների արդյունքները:
Նալբանդյանն ընդգծել է, որ Լեռնային Ղարաբաղի անմիջական մասնակցությունը խաղաղ կարգավորման բանակցություններին «անհրաժեշտություն է և զգալիորեն կնպաստի հիմնախնդրի կարգավորմանը»:
Քննարկվել են ադրբեջանա-ղարաբաղյան շփման գծում տեղի ունեցած սադրանքները և դրանց հնարավոր հետևանքները բանակցային գործընթացի և հակամարտության գոտում իրադրության վրա, ինչպես նաև առաջիկա անելիքները, բանակցությունների շարունակումը մադրիդյան առաջարկությունների հիման վրա:
Ապրիլ | 24 | 2:43