Epress.am Լուրեր Հայաստանից
ՀՅԴ նախաձեռնությամբ այսօր խորհրդարանում ընթանում էին լսումներ` գազի սակագնի վերաբերյալ: Դաշնակցությունը համոզված է, որ գազի սակագնի գոյացումը հիմնավորված չի, ավելին, առաջարկում է այս խնդրով ստեղծել համապատասխան ժամանակավոր հանձնաժողով, հաղորդում է lragir.am-ը:
Վահան Հովհաննիսյան – ԱԺ ՀՅԴ խմբակցության ղեկավար
– Իշխանությունները հայտարարեցին, թե որոշակի սոցիալական խմբերի համար նվազեցրել են գազի սակագինը: Ձեր կարծիքով, ինչ էր սա նշանակում և ինչ նպատակ էր հետապնդում:
– Կարծում եմ, որ սա մեր պայքարի, ճնշման արդյունքում էր: Իհարկե, կատարվածը լիարժեք չի կարելի համարել, սակայն դրա տակ դրական երևույթ, այնուամենայնիվ, կա, որովհետև իշխանության կողմից սոցիալական լուծում է: Եվ պարզվեց, որ իշխանությունը կարողացավ ռեզերվ գտնել` իջեցնելու գազի սակագինն ամենաանապահով խավի համար: Բայց ռեզերվը գտնվեց պետության գրպանում, մեր բյուջեի մեջ: Այնինչ, կարծում ենք, ռեզերվը պետք էր որոնել Հայռուսգազարդի գործունեության մեջ: Թե որքանով է դա հնարավոր, այդ նպատակին են ծառայում այս լսումները, և այն հանձնաժողովը, որ առաջարկում ենք ստեղծել:
– Իսկ որքանո՞վ է հնարավոր Հայռուսգազարդի գրպանում գտնել այդ ռեզերվը:
Չգիտեմ: Դա իմանալու համար էլ հենց առաջարկում ենք ստեղծել ԱԺ ժամանակավոր հանձնաժողովը: Ես չեմ կարող այդ հարցին պատասխանել միանշանակ, քանի որ չունեմ մեխանիզմ` պառլամենտական կոնտրոլն իրականացնելու:
Վարդան Բոստանջյան , ԲՀԿ խմբակցության պատգամավոր, ԱԺ տնտեսական հարցերի մշտական հանձնաժողովի փոխնախագահ:
– Այսօր գազի համար սահմանված սակագինը, ձեր կարծիքով, որքանով է հիմնավոր:
– Բոլոր դեպքերում, այս դեբատները հենց դրա շուրջն են, թե որքանով են հիմնավոր: Ես չունեմ պատճառ` մտածելու, որ գազի սակագինը հիմնավորված չի: Ես հասկանում եմ` ՀՀ-ում եկամուտների ցածր մակարդակում ծագում են նման հարցեր, կասկածներ: Բայց եթե մակերեսային հայացք ձգենք, կտեսնենք` գազամատակարարումն ինչ արժի ամբողջ աշխարհում, և ինչ արժի ՀՀ-ում: Ու կտեսնեք, որ մեզանում գտնվում է ավելի ցանկալի, նպաստավոր դաշտում: Եվ այս առումով, ես ինձ թույլ չեմ տա ասելու, որ անհիմն է գնագոյացումը: Եթե այդպես է, ասեք` ձրի տան:
– Դաշնակցությունը պնդում է, որ իր պայքարի արդյունքում են իշխանությունները գազի սակագինը որոշ սոցիալական խավերի համար նվազեցրել: Սա ինչպես կմեկնաբանեք:
– Թե հիմա ում արդյունքում եղավ, կարևոր չի: Պետությունն ինքն էլ գիտի, որ սոցիալական խոցելի խմբեր ունենք, որոնց ցածր եկամուտների պայմաններում դժվար է նման ծառայություններից օգտվելը: Բնականաբար, պետությունն իր քաղաքականությամբ այնպես է անում, որ սոցիալական խոցելի խմբերը չգտնվեն դժվար իրավիճակներում: Թե որ քաղաքական ուժը հիմա կանի դա, ես կարծում եմ` էական չի:
– Դաշնակցությունն ասում է, որ ցավոք սրտի լուծումները պետության գրպանից գտնվեցին, մինչդեռ, կարելի էր գտնել Հայռուսգազարդի գործունեության մեջ:
– Կարևոր չի, թե որ գրպանում գտնվեց: Կարևորը` գտնվեց սոցիալական հարցի լուծումը:
Սուքիաս Ավետիսյան, ԱԺ ՀՀԿ խմբակցության պատգամավոր, ԱԺ Սոցիալական հարցերի մշտական հանձնաժողովի փոխնախագահ
– Ձեր կարծիքով, որքանով է հիմնավոր գազի այս սակագինը, քանի որ ՀՅԴ–ն կասկածում է սակագնի հիմնավորվածությանն ու առաջարկում է դա ուսումնասիրելու համար ստեղծել ԱԺ ժամանակավոր հանձնաժողով:
– Այդ հիմնավորումներն արդեն մեկ տարի շարունակ ասում են համապատասխան կառույցները: Էլ ինչ եք ուզում: Ես կարծում եմ` այդ գնագոյացումն օբյեկտիվ է:
– Ինչպես կմեկնաբանեք գազի սակագինը որոշակի սոցիալական խմբերի համար նվազեցնելու մասին հայտարարությունները: ՀՅԴ–ն պնդում է, որ լուծումները պետության գրպանից գտնվեցին, մինչդեռ, կարելի էր գտնել Հայռուսգազարդի գործունեության մեջ:
– Վերջին հաշվով, կապ չունի, թե որտեղից գտնվեցին այդ միջոցները: Համենայն դեպս, պետությունը փորձել է սոցիալական ցածր խմբերին օժանդակել: Սոցիալական անապահով խավերին գումարները, որ տալիս ենք, դա էլի բյուջեից չէ՞: Բնական է, որ Հայռուսգազարդը չի կարող իր եկամուտներից տալ այդ գումարը, ասվեց, թե ինչքան են եկամուտները, եւ հիմա պետությունն է փորձում դա լուծել: Էլ ինչո՞ւ եք դրա տակ բան ման գալիս: Պետությունն է պատասխանատու սոցիալական խնդիրների լուծման համար, եւ պետությունն էլ իր միջոցներից տալիս է: