Էրդողանի ելույթից հետո հարձակվել են նրա թիկնազորի մեքենայի վրա. կա մեկ զոհ

Թուրքիայի Քաթամոնու շրջանում անհայտ անձանց կողմից իրագործված հարձակման հետևանքով մեկ ոստիկանության սպա զոհվել և ևս երկուսը վիրավորվել են չորեքշաբթի` անմիջապես Ռեջեփ Թայիփ Էրդողանի նախընտրական քարոզարշավի շրջանակներում անցկացված ելույթից հետո: Նշենք, որ ոստիկանական մեքենան Էրդողանի թիկնազորի մաս էր կազմում և ուղեկցում էր Էրդողանի այցը լուսաբանող լրագրողների ավտոբուսը:

Քասթամոնուի շրջանի իր աջակիցների հետ հանդիպումից հետո Էրդողանը ուղղաթիռով մեկնել է Ամասյա, վարչապետի հեռանալուց կարճ ժամանակ անց տեղի է ունեցել հարձակումը:

Վարչապետի ներկայացուցիչները հայտնել են CNN Türk TV-ին, որ մեկ ոստիկանության սպա է զոհվել և երկուսը վիրավորվել զինված խմբավորման և ոստիկանության սպաների միջև սկսված կարճ փոխհրաձգության հետևանքով:

Ավելի ուշ հեռուստաալիքներում հայտնվել են այն կադրերը, ինչպես է Էրդողանը ժամանում Ամասյա, որտեղ նրան դիմավորում են «Արդարություն և զարգացում» կուսակցության իր հազարավոր թիմակիցները:

Դեպքի վերաբերյալ մի քանի վարկածներ են շրջանառվում:

NTV հեռուստաալիքի հաղորդմամբ, նռնակ է նետվել ոստիկանության մեքենայի վրա, որի արդյունքում այն սկսել է այրվել:

Ականատեսներից մեկի խոսքով` ավտոբուսն ուղեկցող ոստիկանության մեքենան անմիջապես «կրակե գնդի» է վերածվել պայթյունից հետո: Թեև մամուլում հաղորդվում էր, որ պայթյունը հենց նռնակի հետևանք էր, կառավարության պաշտոնատար անձինք հայտնել են, որ պայթյունը  տեղի է ունեցել մեքենայի ուղղությամբ արձակված կրակոցների հետևանքով:

Ավելի ուշ Ամասիայում Էրդողանը հանրահավաքի  ելույթի ժամանակ հարձակման մեջ մեղադրել էր անջատողական գրոհայիններին:

«Միայն այդ խավար ուղեղները, այդ ահաբեկիչները, այդ անջատողականներն էին ունակ անել նման բան, նրանք, ովքեր հասկանում են, որ հաջողության չեն կարող հասնել ընտրատուփի միջոցով»,-ասել է Էրդողանը:

Ելույթին ներկա գտնված անձինք նշում են, որ Էրդողանի մեկնաբանություններից կարելի էր եզրակացնել, որ հարձակման հետևում նա տեսնում է Քրդական բանվորական կուսակցությանը: