Home / Հայաստան / Տիգրան Կարապետյանը համարում է, որ արժանի չէ «այս նվազ մարդկանց թվին»

Տիգրան Կարապետյանը համարում է, որ արժանի չէ «այս նվազ մարդկանց թվին»

Մենք այսօր արձանագրում ենք, որ ժողովուրդը հիասթափված է, որովհետև ժողովրդին խաբել են բոլորը` բացի Տիգրան Կարապետյանից:

Այսօր այս մասին ասել է Մատենադարնի հարակից տարածքում հանրահավաք հրավիրած Ժողովրդական կուսակցության առաջնորդ Տիգրան Կարապետյանը:

«Մենք ապրում ենք մի իրականության մեջ, որ ժողովուրդը չի հասկանում, որ երկիրն իրանն ա, հողն ու փողն իրանն ա: Դուք թույլ եք տալիս, որ ձեզ թալանեն, բարձրահարկ շենքեր կառուցեն: Մենք ստրուկ ենք, իսկ այն առաջանորդը, որ մեզ ազատություն է խոստանում, տեսնում է, որ ժողովուրդն իր լավն ու վատը չգիտի, հոգնում է` իրենք էլ են վաճառվում: Ինչո՞ւ, այս կյանքին ե՞ք դուք արժանի: Այն մարդը, որ բարեգործություն ա անում, որը պատրաստ ա Դանկոյի պես սիրտը ձեզ նվիրի, դուք չեք գնահատում: Թալանողներին, լափողներին, տանողներին, խաբողներին գնահատում եք, կամ վախում եք: Ինչքա՞ն կարող եք վախենալ: Բա մենք արժանի՞ էինք այս նվազ մարդկանց թվին: Ձեզ էնքան խաբեցին, էնքան ստեցին, որ դուք էլ չգիտեք` ինչ եք անում: Էս կյանքին ե՞ք դուք արժանի: Հազարավոր մարդիկ են զանգահաում մեզ, խոստումներ են տալիս, ասում են` Կարապետյան, դու կլինե՞ս վճռական: Գալի՞ս եք, որ վճռական լինենք, սատարո՞ւմ եք, որ ձեզ հետևենք, մեր կյանքը դնում ենք ձեզ համար, բա դուք արժանի՞ եք, որ մեր կյանքը դնենք: Դուք գոնե հասկանո՞ւմ եք, որ մենք ապագա չունենք, մեր ապագան ուրիշ ձեռքերում ա, և այդ ձեռքերը և արնոտ են, և աղտոտ են, և ազնիվ չեն»,- իր ելույթում մոտ 300 հարյուր հավաքված մարդկանց վրա հարցերի տարափ է տեղացել Տիգրան Կարապետյանը:

Հանրահավաքից հետո Կարապետյանը զրուցել է լրագրողների հետ, և հայտարարել, որ «բոլորը խաբել են ժողովրդին, այդ իսկ պատճառով մարդկանց թիվը քիչ էր»:

«Հիասթափված են այնպիսի գործիչներից, որոնք ասում են թաթար-մոնղոլ, որոնք ասում են 30 օրից քշելու ենք ղարաբաղցիներին ստեղից, բայց չեն քշում»,- ասել է նա:

Epress.am-ի այն հարցին, թե ինչ քայլեր է պատրաստվում հետագայում ձեռնարկել Կարապետյանը, վերջինս ասել է.

«Մենք կտեղեկացնենք, համենայն դեպս հայրենասիրական ուժերի դաշինք ենք ստեղծելու»:

Ի դեպ, երբ Կարապետյանն արդեն իր մեքենայում էր և պատրաստվում էր հեռանալ, ոստիկանության ՊՊԾ գնդի պետ Վալերի Օսիպյանը կանգնեցրեց մեքենան և վերջինիս հարցրեց, թե որքան մարդ կար հանրահավաքում: Կարապետյանը պատասխանեց.

«Մոտ 800, 800-ից 1000 էլի»:

Անմիջապես դրանից հետո Epress.am-ի լրագրողը հարց ուղղեց Օսիպյանին հանրահավաքի մասնակիցների թվի մասին: Օսիպյանն ասած, որ հանրահավաքին մասնակցում էր 800-1000 մարդ: