Փաստաբանների դպրոցի այս տարվա ընդունելության քննությունների ընթացքում տեխնիկական խնդիրներ են առաջացել, որի արդյունքնում դիմորդներից 15-ի քննական թեստերը համակարգիչներից անհետացել են: Նրանց դպրոցը խնդրել է նորից հանձնել քննությունը, սակայն դիմորդ Աննա Խաչատրյանը պնդել է, որ դպրոցը պետք է պատասխանատվություն կրի իր համակարգիչների անսարքության համար և դիմել է դատարան: Գործը դատարան է մտել ավելի քան մեկ ամիս առաջ, սակայն վարույթ չի ընդունվել:
Այս մասին Epress.am-ին պատմել է դիմորդի իրավունքների պաշտպան Հելսինկյան ասոցիացիայի փաստաբան Գայանե Խաչատրյանը:
Ձգձգման մեջ կողմը դիտավորություն է տեսնում, քանի որ ուսումնական տարին դպրոցում շուտով սկսվելու է: Աննա Խաչատրյանն իր դիմումում նշել է, որ Փաստաբանների պալատը ոչինչ չի անում մարդկանց՝ իրենց համակարգիչների անսարքության պատճառով խախտված իրավունքների վերականգնման համար: Խաչատրյանը պահանջում է ապահովել իր սովորելը դպրոցում առանց երկրորդ քննությունը հանձնելու:
Նշենք, որ դիմորդները քննությունը հանձնելու համար վճարում են 35.000 դրամ, իսկ դպրոցի ուսման վարձն է տարեկան 400.000 դրամ: Մինչդեռ դեռևս 2009 թվականին դպրոցի բացման մասին ծրագիրը ներկայացնելով ՝ պալատի նախագահ Ռուբեն Սահակյանն ասել է, որ դպրոցն ուսումն անվճար է անցկացնելու, քանի որ կառուցվելու է դատաիրավական բարեփոխումների 2009-2011թ. Ռազմաիրավական գործողությունների ծրագրի շրջանակներում:
Հարկ է հիշեցնել նաև, որ, համաձայն Փաստաբանների մասին ՀՀ օրենքում կատարված բարեփոխումների, Փաստաբանների պալատին կից դպրոցի մի տարվա կուրսն անցնելը փաստաբան աշխատելու համար արտոնագիր ստանալու միակ ճանապարհն է: