Epress.am Լուրեր Հայաստանից
«Գազպրոմ Արմենիա» ընկերության տեսուչները վերջին երկու ամիսներին իրենց կողմից հսկվող տարածքներում գազի վարձը չվճարած քաղաքացիների փոխարեն ստիպված են լինում վճարել սեփական գրպանից: Այս մասին Epress.am-ին հայտնել է «Եկեք կանխենք գազի թանկացումը» քաղաքացիական նախաձեռնության ներկայացուցիչ Անի Կաղինյանը։ Նրա խոսքով՝ իրենց նախաձեռնությանը ահազանգել են մի քանի գազի տեսուչներ:
«Քանի որ բնակիչների սոցիալական վիճակը էլ ավելի է վատացել, նրանք խնայում են գազը, խնդրում են տեսուչներին ժամանակ տալ՝ պարտքը մարելու համար։ Եթե, օրինակ, գալիս են պայմանավորվածության, որ ամսի 25-ին կվճարեն, սակայն գումարը չեն կարողանում գտնել, ղեկավարությունը ստիպում է, որ տեսուչն ինքը իր քարտից աշխատավարձը հանի ու պարտքը մուծի՝ պատճառաբանությամբ, թե ինքն էր պայմանավորվել, ինքն էլ պատասխանատու է»,- պատմել է Անի Կաղինյանը:
Նա նշել է, որ այս տարվա սկզբից ընկերությունն անգամ վերցնում է տեսուչների բանկային քարտերը, որոնց միջոցով նրանք աշխատավարձ են ստանում:
Նախաձեռնության ներկայացուցչի խոսքով՝ դա «Գազպրոմ Արմենիա» ընկերությանը կողմից կիրառվող աշխատանքի իրավունքի միակ ոտնահարումը չէ։ Դեռևս այն ժամանակվանից, երբ ընկերությունը կոչվում էր «Հայռուսգազարդ», այնտեղ հետևյալ պրակտիկան է կիրառվում. տեսուչների հետ աշխատանքային պայմանագրեր կնքելուց տեսուչներին ստիպում են նաև ստորագրել աշխատանքային պայմանագիրը խզելու մասին փաստաթղթեր, որոնցում նշված չէ ազատման ամսաթիվը:
«Այդ փաստաթղթերը մնում են տնօրինության մոտ, ցանկացած պահի, եթե տեսուչը տնօրինության քաղաքականությանը հակասող մի քայլ անի, այդ փաստաթղթերը առանց իրեն հարցնելու կհամարվեն վերջնական, և նա կհեռացվի աշխատանքից»,- ասել է Անի Կաղինյանը:
«Գազպրոմ Արմենիա» ընկերության մամուլի խոսնակ Շուշան Սարդարյանը Epress.am֊ի հետ զրույցում ասել է, որ այն տեսուչները, ովքեր բախվել են տվյալ խնդրին, կարող են դիմել տնօրինությանը։
Երբ Epress.am-ի թղթակիցը նշել է, որ տեսուչները չեն ցանկանում բացահայտել իրենց անունները, վախենալով կորցնել աշխատանքը,
Սարդարյանն ասել է, որ ինքը տեղեկություն չունի, թե տեսուչներին ստիպում են վճարել բաժանորդների փոխարեն:
«Մենք ունենք թեժ գիծ, եթե որևէ մեկը ունի բողոք, կարող է զանգահարել: Բողոքը պետք է հասցեատեր ունենա, չէ՞»,- ասել է Սարդարյանը:
Ինչ վերաբերում է աշխատանքային պայմանագրերի կնքմանը, Սարդարյանն ասել է, որ այդ հարցը պետք է ճշտի իրավաբաններից, իսկ այսօր՝ ապրիլի 4-ը, ոչ աշխատանքային օր է: