Հայաստանցի օլիգարխները, ինչպես նաև արտերկրներում բնակվող հայազգի օլիգարխները խոչընդոտում են պետության զարգացմանը։ Այս մասին այսօր ԱԺ֊ում հայտարարել է ՀԱԿ խմբակցության պատգամավոր Հրանտ Բագրատյանը։
«Երբ որ օլիգարխը գալիս, մի հատ մոլ է կառուցում, ամեն մոլի դիմաց 1500 հատ փոքր խանութ է փակվում։ էդ նշանակում է, որ եթե ինքը 300 միլիոն դոլար ծախսեց մոլի դիմաց, 400 միլիոն ստացավ էն փոքրերից։ Մինչև հիմա Կառավարությունը մի հատ որոշում չարեց, որ էս երկրում լինելու է մեկ֊երկու հատ մոլ, էն էլ Սովետաշենում»,֊ ասել է Բագրատյանը։
Պատգամավորի խոսքով՝ անգամ եկեղեցի կառուցելը մեծ բեռ է դառնում պետության և հասարակության վրա, քանի որ ոչ մի օլիգարխ, եկեղեցի կառուցելիս, չի հաշվարկում դրա պահպանման համար ծախսերը։
«Մենք ունեք 6500 եկեղեցի՝ 9 միլիոն հայության վրա, 1456 մարդուն մի եկեղեցի։ Ավելի բարձր խտությունը միայն հույներն ունեն։ Իհարկե, պետք են եկեղեցիներ, բայց չափ կա, սահման կա, էդ եկեղեցիները, որ դուք կառուցում եք, տարեկան 1-2 տոկոս ամորտիզացիա հաշվեք։ 500 տարի հետո ո՞վ է պահելու։ 6500 եկեղեցու վրա ծախսվել է 30 միլիարդ դոլար, դրա տարեկան ամորտիզացիան անում է 400 միլիոն դոլար»,֊ ասել է նախկին վարչապետը։