Home / Մեդիա / Պատերազմող երկրի վարչապետը չի կարող խուսափել օլիգարխների հարսանիքներից

Պատերազմող երկրի վարչապետը չի կարող խուսափել օլիգարխների հարսանիքներից

Հայաստանի վարչապետը, որ ժողովրդի ձեռքերի վրա հեղափոխությամբ եկավ իշխանության, իր հետ փողոցից կառավարություն եկած մի խումբ քաղաքական գործիչների հետ ներկա է գտնվել Հայաստանի քրեաօլիգարխիայի երկու խոշոր ընտանիքի (մեծահարուստներ Խաչատուր Սուքիասյանի՝ Գռզոյի, որդու և Գագիկ Ծառուկյանի՝ Դոդի Գագոյի, դստեր – խմբ․) հարսանիքին: Այն քրեաօլիգարխիայի, որ հարստացել է թալանելով, սպանելով ու ունեզրկելով Հայաստանի բնակիչներին:

Իհարկե, տհաճ պատկեր է: Բայց մի՞թե Նիկոլ Փաշինյանը, որ ամբողջ կյանքը ելույթ է ունեցել քրեաօլիգարխիայի դեմ, այսքան հեշտ մոռացավ իր անցյալը: Կարծում եմ՝ ոչ: Երբ նա չի իրականացնում հեղափոխություն, նա պարզապես այլընտրանք չունի, քան համագործակցել քրեաօլիգարխիայի հետ: Իսկ նա հեղափոխություն չի անում, նա լուծում է իշխանության հարց: Հայաստանը պատերազմող երկիր է՝ գետտոյացված: Հասարակությունը փախուստ է տալիս պատերազմից՝ կամ արտագաղթելով, կամ առերեսումից խուսափելով: Փաշինյանը լավ է հասկանում սա, դրա համար էլ շարունակում է սովորական դարձած պատերազմի հռետորաբանությունը՝ վախենալով այլ դիսկուրս մտցնելու դեպքում չհասկացվել և կորցնել էլեկտորատ:

Քանի Հայաստանը պատերազմում է, և հասարակությունը չունի պատերազմն ավարտելու պահանջ, Հայաստանի տնտեսությունը օլիգարխական է լինելու: Եվ Հայաստանի բոլոր ղեկավարները պիտի գնան ու չոքեն օլիգարխիայի փողի առաջ: Քանի պատերազմի և խաղաղության մեջ Հայաստանը անկայուն ճոճվում է, հայկական հեղափոխությունների մաքսիմալ արդյունքը սա կարող է լինել՝ փչացածներին փոխարինել չփչացածներով, հետո նույնը՝ նորից:

Գայանե Այվազյան
աղբյուր՝ ֆեյսբուքի էջ